मुंबई : शिवसेनेचे आमदार प्रताप सरनाईक यांचा क्वारंटाईनचा काळ आज संपत असून सक्तवसुली संचनालयाने (ईडी) त्यांना व त्यांचा पूत्र विहंग यांना समन्य बजावले आहे. हे दोघेही गुरुवारी ईडी कार्यालयात चौकशीसाठी हजर होण्याची शक्यता असल्याचे सूत्रांकडून सांगण्यात आले आहे.
आमदार सरनाईक यांचे मुंबई तसेच ठाणे येथील कार्यालये आणि घरावर ईडीने २४ नोव्हेंबरला छापा टाकत कारवाई केली होती. त्यानंतर ईडीने विहंग सरनाईक यांची चौकशी सुरू केली होती. ईडीने आमदार सरनाईक यांना चौकशीसाठी हजर राहण्यासाठी समन्स बजावले होते. मात्र, सरनाईक हे चौकशीसाठी हजर झाले नाहीत. त्या ऐवजी ते क्वारंटाईन झाले. हा कालावधी आज संपतो आहे. दरम्यान, सूत्रांच्या माहितीनुसार, शिवसेना आमदार प्रताप सरनाईक यांचा मुलगा विहंग सरनाईक याला ईडीकडून तीन वेळा समन्स बजावण्यात आले. मात्र तो उपस्थित राहिला नाही. त्यालाही सरनाईक यांच्याबरोबर समन्स बजावण्यात आले आहे.
टॉप्स ग्रुपप्रकरणी तपास करणाऱ्या सक्तवसुली संचालनालय (ईडी) अटक केलेले अमित चांदोळे यांना न्यायालयाने रविवारी न्यायालयीन कोठडी सुनावली आहे. चांदोळे शिवसेना आमदार प्रताप सरनाईक यांचे निकटवर्तीय मानले जातात. लंडन येथील मालमत्तांप्रकरणी ईडीने चांदोळे यांची १२ तास चौकशी केल्यानंतर २५ नोव्हेंबरला मनी लॉंडरिंग प्रतिबंधक कायदा (पीएमएलए) कलम ३ व ४ अंतर्गत त्यांना अटक केली होती. याप्रकरणी रविवारी न्यायालयाने त्यांना ९ डिसेंबरपर्यंत न्यायालयीन कोठडी सुनावली आहे.
टॉप्स ग्रुपला मिळालेल्या एमएमआरडीएच्या कंत्राटात गैरव्यवहार करून त्यातील दरमहा सहा लाख रुपये त्यांना मिळत असल्याचा आरोप आहे. याप्रकरणी ईडीने मुंबई व ठाण्यातील १० ठिकाणी शोधमोहीम राबवली होती. त्यात चांदोळेच्या ठिकाणाचाही सहभाग होता. याप्रकरणी ईडीच्या रडारवर आलेल्या व्यावसायिक देवाण-घेवाणीबाबतची माहिती चांदोळेला असल्याचा संशय आहे. या प्रकरणी रमेश नायर यांच्या तक्रारीवरून यलो गेट पोलिस ठाण्यात टॉप्स ग्रुपचे संस्थापक राहुल नंदा यांच्यासह आठ जणांवर फसवणुकीचा गुन्हा दाखल करण्यात आला होता.
Edited By - Amit Golwalkar
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.