महापौरांच्या मुलाला आणि जावयाला किती मिळाले? शेलारांचा सेनेला सवाल - Ashish Shelar Questions diversification of Funds in BMC | Politics Marathi News - Sarkarnama

महापौरांच्या मुलाला आणि जावयाला किती मिळाले? शेलारांचा सेनेला सवाल

सरकारनामा ब्युरो
गुरुवार, 31 डिसेंबर 2020

महापालिकेच्या अर्थसंकल्पातील शिलकीतून ४०० कोटी रुपये कोरोना खर्चासाठी वर्ग करण्याचा प्रस्ताव शिवसेनेने बहुमताच्या जोरावर मंजूर केल्याच्या बाबत भाजपचे आमदार आशिष शेलार यांनी शिवसेनेवर टीकेची झोड उठवली आहे

मुंबई : महापालिकेच्या अर्थसंकल्पातील शिलकीतून ४०० कोटी रुपये कोरोना खर्चासाठी वर्ग करण्याचा प्रस्ताव शिवसेनेने बहुमताच्या जोरावर मंजूर केल्याच्या बाबत भाजपचे आमदार आशिष शेलार यांनी शिवसेनेवर टीकेची झोड उठवली आहे. हा प्रस्ताव परत पाठवा  अशी सूचना स्थायी समितीत भाजपाच्या नगरसेवकांनी मांडली असता ती शिवसेनेने ना मंजूर का केली? का लपवाछपवी करताय? असा सवाल शेलार यांनी विचारला आहे. 

करोना संसर्गाचा प्रतिबंध व आरोग्य व्यवस्था उभी करण्यासाठी पालिका प्रशासनाने आकस्मिक निधीतून १६३२ कोटी रुपये खर्च केले आहे. त्यात आणखी ४०० कोटी अर्थसंकल्पाच्या शिलकीतून वळते करण्याबाबतचा प्रस्ताव स्थायी समितीच्या बैठकीत बुधवारी मंजूर करण्यात आला आहे. काँग्रेस, समाजवादी पार्टी, राष्ट्रवादी आणि भाजप यांनी एकत्र येऊन या प्रस्तावाला विरोध केला होता. मात्र, शिवसेनेनेहा प्रस्ताव मंजूर केला. 

मुंबई महापालिकेचे विरोधी पक्षनेते रवी राजा, राष्ट्रवादीच्या गटनेत्या राखी जाधव आणि समाजवादी पक्षाचे रईस शेख यांनी या प्रस्तावाला विरोध केला होता. भाजपचे गटनेते प्रभाकर शिंदे यांनीही या प्रस्तावाला विरोध केल्याने शिवसेना एकाकी पडली होती. कालच्या बैठकीच्या वेळी भाजपने या विषयावर मतदानाची मागणी केली. परंतु, शिवसेनेने बहुमताच्या जोरावर हा प्रस्ताव मंजूर करून घेतला. 

याबाबत शेलार यांनी दोन ट्वीट केली आहेत. मुंबईकर कोरोनाने दगावले मात्र पालिकेतील सत्ताधाऱ्यांनी कोरोना काळात आपले गोदाम भ्रष्टाचार करुन भरले? हिशेब द्या! अशी मागणीही शेलार यांनी केली आहे. मुंबई पालिकेचे कोरोनावर 6 महिन्यात १६०० कोटी रुपये खर्च झाले आहेत. तरी अजून ४०० कोटी हवेत असे पालिका म्हणतेय. पण झालेल्या खर्चाचा हिशेब का देत नाही? महापौरांच्या मुलाला आणि जावयाला किती मिळाले? सॅनिटायझर पुरवणाऱ्या बोगस कंपन्यांच्या घशात किती घातले? पर्यावरण प्रेमी वरळीला किती गेले? असे सवाल शेलार यांनी उपस्थित केले आहेत.
Edited By - Amit Golwalkar

अधिक राजकीय बातम्यांसाठी सरकारनामा अॅप डाऊनलोड करा
Play Store    App Store

संबंधित लेख