सोशल डिस्टन्सिंगचे उल्लंघन; भाजपचे आमदार रमेश कराड यांच्यावर गुन्हा दाखल 

बीड ः परळी तालुक्‍यातील गोपीनाथ गड येथे जाऊन भारतीय जनता पक्षाचे विधान परिषदेचे नवनिर्वाचित सदस्य (आमदार) रमेश कराड यांनी गुरुवारी दिवंगत गोपीनाथ मुंडे यांच्या समाधी स्थळाचे दर्शन घेतले. या वेळी त्यांनी जिल्हाधिकारी यांचा संचार बंदीचा आदेश झुगारून समर्थकांसह जमाव जमवून सोशल डिस्टन्सिंगचे उल्लंघन केल्याप्रकरणी त्यांच्यासह 22 जणांवर परळी ग्रामीण पोलिस ठाण्यात गुन्हा दाखल करण्यात आला आहे. 

आमदार रमेश कराड यांनी गोपीनाथ गड येथे पोलिस प्रशासनास कसलीही पूर्व कल्पना न देता अचानक दर्शनास येऊन लोक जमा केले. या वेळी त्यांच्या समवेत भाजप महिला आघाडीच्या जिल्हाध्यक्षा डॉ. शालिनी कराड यांच्यासह सुमारे 20 ते 22 जण होते. 

दरम्यान, कोरोनाचा संसर्ग वाढण्याची शक्‍यता असल्याची माहिती असूनही आमदार कराड व त्यांच्या समर्थकांनी जिल्हाधिकारी यांच्या संचारबंदी आदेशाचे आणि प्रतिबंधक नियमांचे उल्लंघन केले. या प्रकरणी परळी ग्रामीण पोलिस ठाण्यात गुन्हा नोंदविण्यात आला आहे. परळी पोलिस अधिक तपास करीत आहेत.