स्टेजची मोडतोड केली तरी संजय राऊतांनी सभा घेतलीच; बेळगावातील वातावरण झाले भगवे - Shivsena leader MP sanjay Raut criticise karnataka government | Politics Marathi News - Sarkarnama

ब्रेकिंग न्यूज

इंदापूरला उजनीतून पाणी देण्याचा निर्णय रद्द : जयंत पाटील यांची घोषणा
मंत्रीमंडळाच्या उपसमितीच्या बैठकीसाठी महाविकास आघाडीतील प्रमुख नेते सह्याद्रीवर दाखल. एकनाथ शिंदे, बाळासाहेब थोरात, अशोक चव्हाण आणि मुख्य सचिव सिताराम कुंटे हेही उपस्थित आहेत.
मराठा आरक्षणासाठीची भाजपची महत्वाची बैठक आज विरोधी पक्ष नेते देवेंद्र फडणवीस यांच्या निवासस्थानी होत आहे. यासाठी रविंद्र चव्हाण, चंद्रकांत पाटील, गिरीश बापट, प्रवीण दरेकर उपस्थित आहेत.

स्टेजची मोडतोड केली तरी संजय राऊतांनी सभा घेतलीच; बेळगावातील वातावरण झाले भगवे

सरकारनामा ब्यूरो
गुरुवार, 15 एप्रिल 2021

सभा सुरू होण्यापूर्वीच काहींनी व्यासपीठ व साऊंड सिस्टीमची मोडतोड केली होती.

बेळगाव : बेळगाव लोकसभा पोटनिवडणुकीत महाराष्ट्र एकीकरण समितीकडून शुभम शेळके यांना उमेदवारी देण्यात आली आहे. त्यांच्या प्रचारासाठी काल रात्री बेळगावमधील संयुक्त महाराष्ट्र चौकात व्यासपीठ उभारण्यात आले होते. सभा सुरू होण्यापूर्वीच काहींनी व्यासपीठ व साऊंड सिस्टीमची मोडतोड केली. पण त्यानंतरही शिवसेना नेते खासदार संजय राऊत यांनी त्याचठिकाणी सभा घेतली. त्यापूर्वी त्यांचा रोड शोही झाला. राऊत यांच्या तडाखेबंद भाषणाने बेळगावमधील वातावरण भगवे झाले.

राऊत यांच्या सभेला मोठ्या संख्येने मराठी बांधवांनी गर्दी केली होती. राऊत यांच्या भाषणाने मराठी बांधवांमध्ये उत्साह संचारला. यावेळी समितीचे अध्यक्ष दीपक दळवी, खासदार धैर्यशील माने, प्रकाश शिरोळकर, अरविंद नागनोरी आदी उपस्थित होते. या सभेपूर्वी राऊत यांचा रोड शोही झाला. त्यामध्ये मोठ्या संख्येने मराठी बांधव सहभागी झाले.

सभेमध्ये पंतप्रधान मोदींवर टीका करताना राऊत म्हणाले, पंतप्रधान नरेंद्र मोदी, गृहमंत्री अमित शहा पश्चिम बंगालची सत्ता मिळविण्यासाठी वणवण करत आहेत. बंगालमध्ये ममतादीदी अन्याय, अत्याचार करत आहेत, असे ते म्हणतात. पण मोदीजी, अन्याय, अत्याचार, दडपशाही पाहायची असेल तर बेळगावमध्ये या. तुम्हाला बंगालमधला अत्याचार दिसतो. पण मोदी ओ मोदी, तुम्हाला तुमच्याच येडीयुरप्पा सरकारची दडपशाही दिसत नाही का?, अशा शब्दांत संजय राऊत यांनी पंतप्रधान मोदींना खुले आव्हान दिले.

पंडित नेहरूंनी चूक केली असेल. पण मग तुम्ही दुरूस्त करा. काश्मीरमध्ये पंडित नेहरूंनी 370 कलम लावून कितीतरी मोठी चूक केली. ते तुम्ही हटवले ना. मग इथेही तेच करा. माझे आणि कर्नाटक सरकारचे भांडण नाही. त्यांच्या हातात काहीच नाही. मुख्यमंत्री कोण हे मोदी ठरवतात. त्यामुळे मुख्यमंत्र्यांच्या हातात काही नाही. हा लढा केंद्र सरकारशी आहे. तुम्ही न्यायाची बाजू घेत असाल, तर या बेळगावात. लोकशाही मानत असाल तर न्याय द्या. तुमची दादागिरी चालणार नाही, अशा शब्दांत राऊत यांनी ठणकावले. 

शिवाजी महाराज नसते तर पाकिस्तानच्या सीमा कर्नाटकपर्यंत आल्या असत्या. पण हिंदुत्वाचे नाव सांगत महाराजांचा पुतळा काढता? भाजपवाल्यांनी हे लक्षात ठेवावे. आम्ही नाक दाबायचे ठरवले तर तुमची तडफड होईल. पाणी, आर्थिक नाड्या बंद केल्या तर? हॅाटेल बंद केली तर? पण आम्ही हे पाप करणार नाही. ही लढाई मराठी माणसाच्या अस्मितेची आहे त्यामुळे या भागात मराठी माणसाच्या एकीची वज्रमूठ कायम राहायला हवी, असे आवाहनही राऊत यांनी केले. 

बेळगाव सीमाप्रश्नासाठी रक्त सांडणारा शिवसेना हा महाराष्ट्रातील एकमेव पक्ष आहे. बेळगावसाठी 69 हुतात्मे दिले आहेत. पण यापुढे रक्त सांडणार नाही, लाठ्या-काठ्या खाणार नाही. भगव्याला हात लावला तर झेंडा खिशात ठेवून दांड्याने ठोकून काढू, असा इशारा राऊत यांनी यावेळी दिला. 

Edited By Rajanand More

अधिक राजकीय बातम्यांसाठी सरकारनामा अॅप डाऊनलोड करा
Play Store    App Store

संबंधित लेख