भाजपला जोरदार चपराक : विरोधी पक्षनेत्याबरोबच सभागृह नेतेपदही काढून घेतले 

अवघे चार नगरसेवक असलेल्या आरपीआय इंदिसे गटाकडे महापौरांनी सभागृह नेतेपद सोपविल्याने महापालिकेतील प्रस्थापित भाजप, शिवसेना, कॉंग्रेस आणि राष्ट्रवादी या पक्षांच्या नगरसेवकांमध्ये खळबळ उडाली आहे.
In Bhiwandi, BJP corporator was removed from the post of House Leader
In Bhiwandi, BJP corporator was removed from the post of House Leader

भिवंडी : भारतीय जनता पक्षाच्या ताब्यात असलेले भिवंडी महापालिकेचे सभागृह नेतेपद महापौर प्रतिभा पाटील यांनी काढून घेत आरपीआय इंदिसे गटाचे नगरसेवक विकास निकम यांच्याकडे सोपवले आहे. महापौर पाटील यांनी मंगळवारी (ता. 16 मार्च) झालेल्या विशेष अर्थसंकल्पीय ऑनलाइन महासभेत निकम यांची सभागृह नेतेपदी नियुक्ती केली आहे. ते उद्या (गुरुवारी, ता. 18 मार्च) सभागृह नेतेपदाचा पदभार स्वीकारणार आहेत. 

अवघे चार नगरसेवक असलेल्या कोणार्क विकास आघाडीकडे महापौरपद आले आहे. त्यानंतर आता अवघे चार नगरसेवक असलेल्या आरपीआय इंदिसे गटाकडे महापौरांनी सभागृह नेतेपद सोपविल्याने महापालिकेतील प्रस्थापित भाजप, शिवसेना, कॉंग्रेस आणि राष्ट्रवादी या पक्षांच्या नगरसेवकांमध्ये खळबळ उडाली आहे. 

भिवंडी महापालिकेत कॉंग्रेसची 47 नगरसेवक असल्याने एकहाती सत्ता होती. मात्र, कॉंग्रेस पक्षाच्या 18 नगरसेवकांनी पक्षाला रामराम करीत महापौरपदाच्या निवडणुकीत कोणार्क विकास आघाडीस पाठिंबा दिला होता. त्यामुळे कॉंग्रेसचे नगरसेवक इमरान खान यांना उपमहापौरपद देऊन कोणार्क विकास आघाडीने कॉंग्रेस पक्षासोबत आपले संबंध कायम ठेवले आहेत. 

असे असताना भिवंडीतील कॉंग्रेस पक्षात आता मोठ्या प्रमाणात गटबाजी उफाळली आहे. येथे पक्षाची मोठी वाताहत झाली आहे, त्यामुळे राजकीय वातावरण तापलेले आहे. गेल्या दोन महिन्यांपूर्वी कॉंग्रेसच्या 18 नगरसेवकांनी राष्ट्रवादी कॉंग्रेस पक्षात प्रवेश केल्यामुळे आणखी राजकीय वातावरण ढवळून निघाले आहे. महापालिकेत भाजपच्या असलेल्या 20 नगरसेवकांनी महापौर निवडणुकीत अवघ्या चार नगरसेवक असलेल्या कोणार्क विकास आघाडीला पाठिंबा दिला होता. त्यानंतर कॉंग्रेस पक्षाला शह देण्यासाठी भाजपला सभागृह नेते आणि विरोधी पक्षनेते पद दिले होते. 

पण, महापौर प्रतिभा पाटील यांनी भाजपकडे असलेले विरोधी पक्षनेतेपद प्रथम काढून घेतले. त्यानंतर बुधवारच्या सभेत सभागृह नेते पदावरही भाजपला पाणी सोडावे लागले. आता सभागृह नेतेपदी आरपीआय इंदिसे गटाचे प्रदेश सरचिटणीस, नगरसेवक विकास निकम यांची वर्णी लावण्यात आली आहे. त्यामुळे भाजपला जोरदार चपराक बसली आहे. विशेष म्हणजे चार नगरसेवक असलेल्या कोणार्क विकास आघाडीकडे महापौरपद, तर चार नगरसेवक असलेल्या आरपीआय इंदिसे गटाकडे सभागृह नेतेपद सोपविल्याने आरपीआय इंदिसे गटात उत्साहाचे वातावरण आहे. 

Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुकट्विटरइन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.

Related Stories

No stories found.
Sarkarnama News
sarkarnama.esakal.com