पुणे : भाजप नेते एकनाथ खडसे यांनी भाजपला रामराम ठोकत राष्ट्रवादी मध्ये प्रवेश करण्याचा निर्णय घेतला आहे. बारा वर्षी पूर्वी ही वेळ माझ्या वर आली होती तेव्हा मी त्यांना सांगितलं होतं, की आज मी जात्यात आहे पुढची मूठ जात्यात तुमची असेल आणि ती वेळ आता खडसे यांच्यावरही आल्याचे माजी आमदार प्रकाश शेंडगे येथे म्हणाले.
अनेक बहुजन नेत्यांवर भाजपने अन्याय केला असल्याचा आरोपही शेंडगे यांनी केला. ते म्हणाले, "भाजप वाढवण्यासाठी तळागाळात आम्ही काम केले, तेव्हा भाजपने माझे तिकीट कापले होते. तीच वेळ एकनाथ खडसे यांच्यावर भाजपने आणली. त्यांचेही तिकीट भाजपने कापले.'' असा अन्याय होणार असेल तर बहुजन नेते भाजप सोडतील, असेही शेंडगे म्हणाले.
मी दिवंगत गोपीनाथ मुंडे यांच्या अपघाताच्या चौकशीची मागणी केली होती, म्हणून मला पक्ष सोडण्यास भाग पाडले. आता एकनाथ खडसेंवरही भाजपने तीच वेळ आणली, असा गंभीर आरोप प्रकाश शेंडगे यांनी केला. गोपीनाथ मुंडे यांच्यासोबत मी काम केले. मुंडेंसोबत ओबीसी समाजाचे अनेक नेते होते. एकनाथ खडसेसुद्धा त्यापैकीच एक आहेत. गोपीनाथ मुंडेंचा जेव्हा अपघात झाला; तेव्हा त्यांच्या मृत्यूची चौकशी सीबीआयमार्फत व्हावी अशी मी मागणी केली होती. माझ्या या मागणीमुळेच मला पक्ष सोडावा लागला. तसेच माझं तिकीट कापण्यात आलं,'' असे शेंडगे म्हणाले.
दरम्यान, माजी मुख्यमंत्री देवेंद्र फडणवीस यांनी पाच वर्षे राज्याचा कारभार उत्तमप्रकारे सांभाळला. या कार्यकुशल नेतृत्वाचा काहींना पोटशूळ उठला आहे. त्यामुळेच एकनाथ खडसेंचा गेम करून देवेंद्र फडणवीसांवर निशाणा साधण्यासाठी राष्ट्रवादीने खडसेंना पक्षात घेतले आहे, अशी टीका विधान परिषदेचे विरोधी पक्ष नेते प्रवीण दरेकर यांनी सातारा येथे बोलताना केली. देवेंद्र फडणवीस यांना कोंडीत पकडून त्यांची छबी बदनाम करण्यासाठी एकनाथ खडसे यांचा वापर केलेला आहे असे ते म्हणाले.
Edited By - Amit Golwalkar
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.