मुंबई : विधानसभेतील गोंधळाच्या नाट्यानंतर भाजपचे बारा आमदार निलंबित झाले आहेत. त्यामुळे भाजपचे विधानसभेतील संख्याबळ बाराने घटले आहे. हे आमदार निलंबित झाल्यानंतर त्यांना इतर आमदारांप्रमाणे सभागृहाच्या कामकाजात सहभागी होता येणार नाही. महाविकास आघाडीने ठराव करताना या आमदारांना विधानभवनाच्या आवारातही फिरकू न देण्याची अट घातली आहे. पुढील एक वर्षासाठी हे आमदार मुंबई किंवा नागपूर येथील विधानभवनाच्या आवारात त्यामुळे येऊ शकत नाहीत, अशी परिस्थिती निर्माण झाली आहे. (12 BJP MLAs suspended in assembly)
विधानसभेत एखाद्या महत्वाच्या मुद्यावर मतदानाची वेळ आली तर हे निलंबित आमदार मतदान करू शकतील का, अशी शंका आता अनेकांना आली आहे. भाजपचे संख्याबळ कमी झाल्याने महाविकास आघाडी सरकार विधानसभा अध्यक्षाची निवडणूक घेईल, असा अंदाज अनेकांचा होता. अद्याप त्या पातळीवर काही हालचाली नाहीत. पण निवडणूक झालीच तर हे आमदार मतदान करू शकतील का, हा प्रश्न चर्चेत राहिला.
याबाबत विधानसभेचे माजी अध्यक्ष अरुण गुजराथी यांनी `सरकारनामा`शी बोलताना सांगितले की निलंबित आमदार विधानसभेच्या सभागृहातही येऊ शकत नाहीत. तेथील कामकाजात भाग घेऊ शकत नाहीत. चर्चा नाही आणि मतदानही करू शकत नाही. ते विधानभवनाच्या आवारात मात्र येऊ शकतात. विरोधी पक्षनेत्याच्या दालनापर्य़ंत येण्याची मुभा त्यांना राहील. त्यामुळे त्यांनी मतदान करण्याचा प्रश्नच नाही.
या आमदारांचे मानधन, सभागृहाबाहेरील बैठका, त्यांचा स्थानिक विकास निधी सुरू राहतील का, या प्रश्नावर गुजराथी म्हणाले की माझ्या माहितीनुसार त्यात कोणता अडथळा येऊ नये. तरीपण याबाबत नक्की काय ठराव झाला, हे पाहायला हवे. माझ्या अध्यक्षपदाच्या कारकिर्दीत निलंबित झालेल्या आमदारांच्या इतर सुविधा सुरू ठेवण्यात आल्या होत्या. त्यानंतरच्या विधानसभा अध्यक्षांनी यात काही बदल केला आहे का, याची मला कल्पना नाही. इतर विधानसभा अध्यक्षांनी यावर अलीकडच्या काळात जो काही निर्णय दिला आहे तो या आमदारांबाबत लागू राहील.
अनेक निलंबित आमदारांनी राज्यसभेच्या निवडणुकीत मतदान केल्याची उदाहरणे यापूर्वी घडलेली आहेत. हे कसे काय, या प्रश्नावर विधीमंडळाच्या एका निवृत्त अधिकाऱ्याने सांगितले की सभागृहातील नियमांचे उल्लंघन आणि गैरवर्तन याबद्दल त्यांना निलंबित केले आहे. राज्यसभेची निवडणूक ही पीपल्स रिप्रेझेंटेटिव्ह (लोकप्रतिनिधी) कायद्याखाली असल्याने त्यांचा मतदानाचा अधिकार तेथे अबाधित राहतो.
विधानसभा अध्यक्षपदाची निवडणूक होणार का?
विधानसभा अध्यक्षपदाच्या निवडणुकीत व्हीप लागू होत नाही. तसेच मतदानही गोपनीय पद्धतीने होते. त्यामुळे ही निवडणूक घेताना महाविकास आघाडीच्या मनात धाकधूक होती. अधिवेशनाची कार्यक्रमपत्रिका ठरविताना ही निवडणूक घेण्याचे नियोजन नव्हते. मात्र आता विधानसभेतील भाजपचे बळ हे 106 वरून बाराने कमी झाली आहे. या निलंबनानंतर भाजपने सभागृहाच्या कामकाजावर बहिष्कार घातला आहे. त्यामुळे साहजिकच महाविकास आघाडीसाठी ही परिस्थिती अनुकूल असल्याचे मानले जात आहे.
निलंबित आमदारांची नावे
संजय कुटे, आशिष शेलार, अभिमन्यू पवार, गिरीश महाजन, पराग अळवणी, राम सातपुते, हरिश पिंगळे, अतुल भातखळकर, जयकुमार रावल, नारायण कुचे, बंटी भांगडिया आणि योगेश सागर. हे आमदार एक वर्षासाठी निलंबित झाले आहेत.
विधानसभेतील पक्षनिहाय आमदारांची संख्या
महाविकास आघाडी सरकारने आपला विश्वासदर्शक ठराव हा 172 मते मिळवून मंजूर करून घेतला होता. त्यामुळे `मॅजिक फिगर`145 पेक्षा अधिक मते महाविकास आघाडीकडे सध्या तरी आहेत. काॅंग्रेस, शिवसेना आणि राष्ट्रवादी या तीन पक्षांची मिळूनच संख्या ही 152 होते. त्यामुळे महाविकास आघाडीचे नेते बहुमताबाबत निश्चिंत आहेत.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.