जळगावच्या महापौर भारती सोनवणे कोविड सेंटरमध्ये करतात भोजन

जळगाव: ‘ताई कोविड सेंटरमध्ये आम्हाला जेवण व्यवस्थित मिळत नाही, अशी भ्रमणध्वनीवरून महापालिकेच्या कोविड सेंटरमधील रूग्णची तक्रार प्राप्त झाली.अन महापौर भारती सोनवणे व त्यांचे पती नगरसेवक कैलास सोनवणे यांनी थेट कोविड सेंटरमध्ये जावून भोजनाची चव घेतली केवळ एक दिवस नव्हे तर जेवणाच्या व नाश्‍ताच्या वेळी अचानक जावून ते स्वत: चव घेवून बघत आहेत. शिवाय दररोज मोबाईलवर प्रत्येक रूग्णांशी चर्चा करीत आहेत.

जळगाव महापालिकेतर्फे शासकीय तंत्र निकेतन व आय.टी.आय.च्या वसतीगृहात कोविड सेंटर तसेच क्वारंटाईन सेंटर करण्यात आले आहे. या ठिकाणी असलेल्या रूग्णांच्या सुविधाबाबत मोठ्या प्रमाणात तक्रारी होत्या. त्यावेळी महापौर भारती सोनवणे व नगरसेवक कैलास सोनवणे यांनी स्वत:त्या तक्रारी निवारण्याबाबत अधिकाऱ्यांना आदेश दिले. मात्र शासकीय स्तरावरचे काम कठीण असते. अधिकारी केवळ काम केल्याचे सांगतात. परंतु, प्रत्यक्षात तक्रारी कायम असतात. 

त्यामुळे महापौरांनी केवळ महापालिकेच्या अधिकारी व कर्मचाऱ्यावर अवंलबून न राहता सुविधांबाबत थेट रूग्णांशीच संवाद सुरू केला आहे. कोविड सेंटर व क्वारंटाईन सेंटरमध्ये असलेल्या रूग्णाला दररोज फोन करून त्या त्यांची विचारपूस करतात व सुविधाबाबत त्यांच्याकडून माहितीही घेतात.

कोविड सेंटरमध्ये जेवण
'कोविड' सेंटरमधील नाश्‍ता व जेवणाबाबत रूग्णांनी महापौर सोनवणे यांच्याकडे मोबाईलवरुन तक्रार केली. त्यावेळी त्या व त्यांचे पती कैलास सोनवणे तातडीने कोविड सेंटरमध्ये गेले. त्यांनी त्या ठिकाणचे जेवण मागवून स्वत: जेवण केले. तेथील स्वयंपाक करणाऱ्या ताबडतोब सूचनाही दिल्या. एवढेच नव्हे तर दुसऱ्या दिवशी सकाळी नाश्‍त्याच्या वेळेस जावून त्यांनी स्वत: नाश्‍ता केला. त्यानंतर त्या अचानक जेवणाच्या वेळी जावून त्या पाहणीही करीत आहेत. या शिवाय या ठिकाणी रूणांवर होणारे उपचार, त्यांना देण्यात येणारी औषधी, याबाबतही त्या माहिती घेत असतात. महापौरच स्वत: पाहणी करीत असल्यामुळे या ठिकाणी असुविधाबाबतच्या तक्रारी कमी झाल्या आहेत. 

Edited By - Amit Golwalkar