सोपलांच्या सांगण्यावरून वेठीस धराल, तर तुमच्या संस्थांमधील भ्रष्टाचार उघड करू - MLA Rajendra Raut's challenge to Co-operation Minister Balasaheb Patil | Politics Marathi News - Sarkarnama

ब्रेकिंग न्यूज

मुख्यमंत्र्यांकडून 5 हजार 400 कोटींचे पॅकेज जाहिर...
पुढील 15 दिवस संचारबंदीच्या काळात अत्यावश्यक सेवा सुरू राहणार...
अत्यावश्यक सेवेतील कर्मचाऱ्यांसाठी सार्वजनिक वाहतूक सेवा सुरू ठेवणार...
नोंदणीकृत घरगुती कामगारांनाही आर्थिक मदत देणार...
नोंदणीकृत फेरीवाल्यांनाही पंधराशे रुपयांची मदत मिळणार...
परवानाधारक रिक्षाचालकांना पंधराशे रुपये देणार...
पुढील महिनाभर गरीबांसाठी मोफत शिवभोजन थाळी...दोन किलो तांदूळ, तीन किलो गहू मिळणार
राज्यात उद्या रात्री आठ वाजल्यापासून संचारबंदी...मुख्यमंत्र्यांची घोषणा

सोपलांच्या सांगण्यावरून वेठीस धराल, तर तुमच्या संस्थांमधील भ्रष्टाचार उघड करू

प्रशांत काळे 
बुधवार, 3 मार्च 2021

आम्हाला हायकोर्ट आणि सर्वोच्च न्यायालय नवीन नाही. ते आमच्या पाचवीलाच पुंजलेले आहे.

बार्शी (जि. सोलापूर) : "मित्राच्या (माजी मंत्री दिलीप सोपल) खोट्या तक्रारीच्या आधारे माहिती न घेता जाणीवपूर्वक जर बार्शी बाजार समितीला कुणी टार्गेट करण्याचा प्रयत्न करत असेल. चौकशा लावून विनाकारण समितीला वेठीला धरण्याचा प्रकार होत असेल तर जशास तसे उत्तर दिले जाईल,'' असा इशारा आमदार राजेंद्र राऊत यांनी राज्याचे सहकार व पणन मंत्री बाळासाहेब पाटील यांना दिला. 

दरम्यान, सहकारमंत्री पाटील यांनी त्यांच्या कऱ्हाड मतदारसंघात कशा पद्धतीने शैक्षणिक संस्था, साखर कारखाने लाटले आहेत. त्यांच्या या संस्थांमध्ये कसा गैरप्रकार सुरू आहे. त्याची माहिती मी घेत आहे. येत्या आठ ते दहा दिवसांत सहकारमंत्र्यांच्या संस्थांमधील अनागोंदी कारभाराची माहिती जमा होईल. त्याबाबत उच्च न्यायालयात मी याचिका दाखल करेन. मित्राच्या सांगण्यावरून मंत्रिपदाचा दुरुपयोग केला, तर जशास तसे उत्तर दिले जाईल. तसेच पाटील यांनी केलेला भ्रष्टाचार लवकरच राज्याच्या निदर्शनास आणल्याशिवाय मी स्वस्थ बसणार नाही, असेही राऊत यांनी सहकारमंत्र्यांना आव्हान दिले. 

बार्शी कृषी उत्पन्न बाजार समितीच्या गाळे वाटपावरून आमदार राऊत आणि माजी मंत्री सोपल यांच्या कलगीतुरा रंगला आहे. सोपल यांनी तक्रारींचा पाढा वाचल्यानेच सहकारमंत्री पाटील यांनी बार्शी बाजार समितीची चौकशी सुरू केली आहे, असा आरोप राऊत यांनी पत्रकार परिषदेमध्ये केला आहे. 

ते म्हणाले, "माजी मंत्री सोपल यांनी बार्शी बाजार समितीवर आरोप करणे निषेधार्ह आहे. बाजार समितीचे कामकाज अत्यंत चांगल्या पद्धतीने चालू आहे. हे संपूर्ण बार्शी तालुका आणि सोलापूर जिल्हा बघत असून सर्व शासकीय यंत्रणांना माहीत आहे. या अगोदरही विरोधकांकडून बाजार समितीबाबत तक्रारी देण्याचा प्रयत्न झाला आहे. त्यामुळे बाजार समितीची तीन वेळा चौकशी झाली. या तीनही चौकशीत काहीही निष्पन्न झाले नाही. चौथी चौकशी सध्या सुरू असून ती लवकरच पूर्ण होईल. त्यात काय येतंय, याची आम्ही वाट पाहणार आहोत. त्या अगोदरच आता पाचवी चौकशी नेमली आहे. बाजार समितीचा 2019-2020 या वर्षाचा लेखापरीक्षण अहवाल आला आहे. तरीही एक विशेष लेखा परीक्षक सहकार मंत्र्यांनी नेमला आहे.'' 

"सहकार मंत्री पाटील यांना मी मधल्या काळात भेटलो आहे. बार्शी तालुक्‍यातील राजकारण हे व्यक्तीगत वादविवादाचे आणि एकमेकांच्या कुरापती काढण्याचे आहे. तालुक्‍यातील काही लोकांच्या खोट्या तक्रारींच्या आधारे बार्शी बाजार समितीला विनाकारण टार्गेट करू नका, असे सांगितले होते. तसेच, बाजार समितीचे कामकाज कसे चाललेले आहे, हेही सांगितले होते,'' असे राऊत यांनी नमूद केले. 

"त्यानंतर परवा बाळासाहेब पाटलांना फोन केला. त्यांना म्हटलं की बाळासाहेब आमचं बार्शी तालुक्‍यातील आरोप-प्रत्यारोपाचे राजकारण आहे. चुकीच्या पद्धतीने बाजार समितीवर आरोप होत आहेत. जर योग्य असेल तर चौकशी करायला किंवा कोणत्याही चौकशीला सामोरे जायला बाजार समिती खंबीर आहे. आम्हाला हायकोर्ट आणि सर्वोच्च न्यायालय नवीन नाही. ते आमच्या पाचवीलाच पुंजलेले आहे. विनाकारण टार्गेट करू नका, अशी मी त्यांना कल्पना दिली आहे,'' असे आमदार राऊत यांनी स्पष्ट केले. 

ते एकत्र तमाशाला जायचे 

सहकार मंत्री बाळासाहेब पाटील यांच्याकडून चौकशीचा असा प्रकार का चालू आहे, याची दोन दिवसांपूर्वी मी कऱ्हाडमधील मित्रांकडून माहिती घेतली. त्या वेळी कळाले की त्यांची (दिलीप सोपल आणि बाळासाहेब पाटील) जुनी मैत्री आहे. ते एकत्र तमाशाला जात होते. खोट्या तक्रारीच्या आधारे माहिती न घेता जाणीवपूर्वक बाजार समितीला कुणी टार्गेट करण्याचा प्रयत्न करत असेल तसेच चौकशा लावून बाजार समितीला वेठीला धरण्याचा प्रकार सहकारमंत्री करत असतील आणि द्वेषाचे राजकारण करत असतील तर त्यांना माहीत नाही की राजेंद्र राऊत यांना वयाच्या 13 व्या वर्षापासून कोर्ट-कचेरीची सवय आहे, हे लक्षात असू द्यावे. 

अधिक राजकीय बातम्यांसाठी सरकारनामा अॅप डाऊनलोड करा
Play Store    App Store

संबंधित लेख