भय इथले संपत नाही! योगींच्या राज्यात गंगा किनारी मृतदेहांचा खच... दोन हजारांहून अधिक मृतदेह पुरले

लखनऊ : उत्तर प्रदेशमध्ये कोरोनाचा कहर सुरू असला तरी मृतांच्या आकड्यावरून आता वाद निर्माण झाला आहे. प्रशासनाकडून मृतांचा आकडा लपवला जात असल्याचा दावा केला जात आहे. कारण गंगा नदी किनारी हजारो मृतदेह पुरल्याचे तसेच अनेक मृतदेह गंगेत सोडून दिल्याचे वास्तव समोर आले आहे. या मृतदेहांची नोंद योगींच्या सरकार दफ्तरी आहे किंवा नाही, याबाबत प्रशासनही हात वर करत आहे. त्यामुळे गंगा नदी किनारी वसलेल्या गावांमध्ये भितीचे वातावरण निर्माण झाले आहे. (Worse Condition of corona crisis in Uttar Pradesh dead body floating i ganga river)

उत्तर प्रदेशमधील २७ जिल्ह्यांमधून गंगा नदी वाहते. यांपैकी अनेक जिल्ह्यांमधील कोरोनाची स्थिती भयावह असल्याचे समोर आले आहे. एका हिंदी वृत्तपत्राने केलेल्या पाहणीमध्ये हे वास्तव समोर आले आहे. जवळपास अकराशे किलोमीटर अंतरात दोन हजारांहून अधिक मृतदेह पुरण्यात आल्याचे दिसून आले आहे. यातील अनेक मृतदेह नदीच्या प्रवाहात गेल्याचे तर काही ठिकाणी नदीत सोडून दिल्याचेही दिसते. 

हेही वाचा : स्पुटनिक लस आली पण महागात पडणार...कोव्हॅक्सिन व कोविशिल्डला टाकले मागे

उन्नावमध्ये ९०० हून अधिक मृतदेह

उत्तर प्रदेशातील उन्नावमधील शुक्लागंज घाट आणि बक्सर घाट परिसर सर्वात मोठे स्मशान बनले आहे. या भागात ९०० हून अधिक मृतदेह पुरण्यात आले आहेत. पावलागणित मृतदेह पुरण्यात आल्याचे दिसते. अनेक मृतदेहांवरील माती गेल्याने ते उघडे पडले आहेत. प्रशासनाकडून या मृतदेहांवर पुन्हा माती टाकली जात असल्याचे दिसून आले. 

कानपूरमध्येही भयावह स्थिती 

कानपूरमधील शेरेश्चवर घाटाजवळ जवळपास ४०० मृतदेह पुरण्यात आले आहेत. तर कन्नोजमधील महादेवी गंगा घाटाजवळ सुमारे ३५० मृतदेह पुरण्यात आल्याचे दिसून आले. जे मृतदेह नदीच्या किनारी पुरले जात आहेत, ते नदीच्या पाण्याची पातळी वाढल्यानंतर प्रवाहात वाहत जातात. नदी किनारी असलेल्या बहुतेक जिल्ह्यांमध्ये हीच स्थिती असल्याची स्थानिक नागरिकांनी सांगितले. 

तसेच बिजनोर, मेरठ, मुजफ्फरनगर, बुलंदशहर, हापुड, अलीगड, कासंगज, संभल, अमरोहा, बदांयू, शाहजहांपूर, हरदोई, रायबरेली, फेतहपुर आदी जिल्ह्यांमध्ये हीच स्थिती दिसून येत असल्याचे पाहणीत आढळले. पश्चिम उत्तर प्रदेशातील काही जिल्ह्यांतील स्थिती सध्या काही प्रमाणात सुधारली आहे. या जिल्ह्यांमध्ये नदी किनारी केवळे एक-दोन मृतदेहच आढळून येत आहेत. दरम्यान, उत्तर प्रदेशातील या स्थितीची दखल राष्ट्रीय मानवाधिकार आयोगानेही घेतली असून केंद्र सरकार, बिहार व उत्तर प्रदेश सरकारला नोटीस बजावली आहे. 

Edited By Rajanand More