नवी दिल्ली : जगभरात कोरोनाबाधितांची संख्या सातत्याने वाढत आहे. गेल्या काही दिवसात संपर्कात आलेल्या एका व्यक्तीचा कोरोना अहवाल पॉझिटिव्ह आल्याने जागतिक आरोग्य संघटनेचे प्रमुख टेडरोस अदनोम घेबियस यांनी होम क्वारंटाइन होण्याचा निर्णय घेतला आहे. याबाबत टेडरोस यांनी टि्वट करून ही माहिती दिली आहे.
टेडरोस अदनोम घेबियस हे सध्या पूर्णपणे स्वस्थ आहेत. परंतु जागतिक आरोग्य संघटनेच्या प्रोटोकॉलप्रमाणे ते घरुनच काम करणार आहेत. टेडरोस आपल्या टि्वटमध्ये म्हणतात की मी करोनाबाधित व्यक्तीच्या संपर्कात आल्याचे दिसून आले आहे. सध्या मी पूर्णपणे स्वस्थ आहे व माझ्या कोणतीही लक्षणं नाहीत. परंतु, जागतिक आरोग्य संघटनेच्या नियमांप्रमाणे मी पुढील काही दिवसांसाठी होम क्वारंटाइनमध्ये असणार आहे व घरूनच काम करणार आहे. क्वारन्टाईन होऊन कोरोनाची चैन तोडता येईल. ज्यामुळे आपण कोरोनाला हरवू शकतो.
जगभरात एकूण बाधितांची संख्या 4,68,04,423 इतकी झाली आहे. यापैकी 12,05,044 लोकांना त्यांचा जीव गमवावा लागला आहे. तर 3,37,42,731 लोकांनी कोरोनावर मात केली आहे. कोरोनाबाधितांच्या संख्येच्या बाबतीत भारत जगात दुसऱ्या स्थानावर आहे. सध्या देशात 5,63,775 अॅक्टिव्ह कोरोनाबाधित रुग्ण आहेत. भारतात आतापर्यंत 82,29,322 कोरोनाबाधितांची नोंद करण्यात आली आहे. यापैकी 1,22,642 रुग्णांचा मृत्यू झाला आहे. तर 75,42,905 रुग्णांनी कोरोनावर मात केली आहे.
हेही वाचा भाजपच्या मोफत कोरोना लशीला निवडणूक आयोगाची 'क्लिनचिट'
नवी दिल्ली : बिहारच्या विधानसभा निवडणुकीत भाजपने कोरोनाच्या मोफत लशीचे आश्वासन दिले होते. यावरुन मोठा गदारोळ उडाला होता. निवडणुकीत अशा प्रकारचे आश्वासन देणे हा आचारसंहितेचा भंग असल्याची तक्रार करण्यात आली होती. या प्रकरणी आता निवडणूक आयोगाने भाजपला क्लिनचिट दिली आहे. दरम्यान, काँग्रेसलाही अशाच एका आश्वासनप्रकरणी मागील लोकसभा निवडणुकीत क्लिनचिट दिल्याचा दाखलाही आयोगाने दिला आहे. माहिती अधिकार कार्यकर्ते साकेत गोखले यांनी मोफत लशीच्या आश्वासनावरुन निवडणूक आयोगाकडे तक्रार केली होती. आयोगाने त्यावर भूमिका स्पष्ट केली आहे. आयोगाने आचारसंहितेतील ३ कलमांचा उल्लेख केला आहे. यामध्ये कोणत्याही पक्षाच्या जाहीरनाम्यात कोणतेही प्रतिकूल आश्वासन असू नये, निवडणूक प्रक्रियेचे पावित्र्य व गांभीर्य यांचा भंग होईल व मतदारांवर प्रत्यक्ष प्रभाव पडेल असा मुद्दा त्यात नसावा आणि पूर्ण करता येतील अशीच आश्‍वासने जनतेला दिली पाहिजेत. या तिन्ही कसोट्यांवर भाजपचे लशीचे आश्वासन चुकीचे ठरत नाही, असे आयोगाने म्हटले आहे.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.