तिरुअनंतपूरम : केरळमध्ये विधानसभा निवडणुकीचे वातावरण तापत आहे. वेंगरा मतदारसंघातील होणीर लढतीने सगळ्याचे लक्ष वेधलं आहे. याठिकाणी एका तृतीयपंथीयाने मुस्लिम लिगचे दिग्गज नेते पी. के. कुन्हाली कुट्टी यांना आव्हान दिले आहे. डेमोक्रॅकिट सोशल जस्टिस पार्टीने (डीएसजेपी) अनन्या कुमारी एलेक्स या तृतीयपंथीय व्यक्तीला तिकीट दिले आहे.
राज्यातील पहिले रेडिओ जॉकी बनून अनन्या कुमारी एलेक्स यांनी विक्रम केला होता. केरळमधील एक प्रसिध्द व्यक्तीमत्व म्हणून अनन्या (वय २८) यांची ओळख आहे. मुस्लिम लीगचा गड मानल्या जाणाऱ्या वेंगरा मतदारसंघातून त्या निवडणूक लढवित आहेत.
एलेक्स म्हणाल्या, "तुम्ही माझ्यावर विश्वास ठेवा. मी चांगले काम करून दाखवेल. माझ्याकडे नेतृत्व करण्याची क्षमता आहे, असे वाटते. मी जिंकले तर सर्वांना समान वागणूक देणे ही मोठी जबाबदारी असेल. लिंग, जात-धर्माच्या आधारे वागवणार नाही. विजय झाल्यास महिला सुरक्षा, शिक्षण, अल्पसंख्याक त्यातही ट्रान्सजेंडर यांच्यासाठी प्रत्येक क्षेत्रात आरक्षणासाठी प्रयत्न करणार आहे. प्रचाराची पूर्वतयारी केली आहे. एक तृतीयपंथी या नात्याने मी लोकांना मत मागणार आहे."
अनन्या यांच्या विरोधातील उमेदवार पी. के. कुन्हाली कुट्टी हे २०११ व २०१६ दरम्यान आमदार होते. मुस्लिम लीगचे अध्यक्ष ई अहमद यांच्या निधनानंतर २०१७ मध्ये मालाप्पुरम लोकसभा मतदारसंघातून ते पोटनिवडणुकीत उतरले आणि विजयी झाले. २०१९ मध्ये ते पुन्हा खासदार झाले. परंतु विधानसभा निवडणुकीच्या आधी त्यांनी राजीनामा दिला. वेंगरात पुन्हा ते मैदानात आहेत. वेंगरामध्ये १.८२ मतदार आहेत. त्यापैकी सुमारे ७० टक्के मुस्लिम आहेत.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.