मोठी बातमी : ममता बॅनर्जींना प्रचारबंदी, निवडणूक आयोगाचा झटका - Election Commission imposes ban on Chief Minister Mamata Banerjee | Politics Marathi News - Sarkarnama

मोठी बातमी : ममता बॅनर्जींना प्रचारबंदी, निवडणूक आयोगाचा झटका

वृत्तसंस्था
सोमवार, 12 एप्रिल 2021

निवडणुकीचे वातावरण चांगले तापलेले असताना तृणमूल काँग्रेसला जोरदार झटका बसला आहे.

कोलकाता : पश्चिम बंगालमधील विधानसभा निवडणुकीचे वातावरण चांगले तापलेले असताना तृणमूल काँग्रेसला जोरदार झटका बसला आहे. मुख्यमंत्री ममता बॅनर्जी यांनी प्रचारादरम्यान केलेले हिंदु-मुस्लिम व सीआरपीएफच्या विरोधात लोकांना भडकावल्याचे वक्तव्य महागात पडले आहे. आयोगाने ममतांना पुढील 24 तासांसाठी प्रचारबंदी केली आहे. या कारवाईमुळे ममतांना प्रचाराचा एक दिवस प्रचारात सहभागी होता येणार नाही.

बंगालमधील निवडणुकीचा प्रचार शिगेला पोहचला आहे. आतापर्यंत चार टप्प्यातील मतदार पार पडले असून अजून चार टप्पे शिल्लक आहेत. तृणमूलसाठी ममता बॅनर्जी या एकट्याच किल्ला लढवत आहेत. त्यातच त्यांच्या पायाला दुखापत झालेली असल्याने त्यांच्या प्रचाराला आधीच मर्यादा आल्या आहेत. पण त्यानंतर त्या भाजपसह पंतप्रधान नरेंद्र मोदी व गृहमंत्री अमित शहा यांच्यावर टीका करण्याची एकही संधी सोडत नाहीत.

एका प्रचारसभेमध्ये त्यांनी मुस्लिमांच्या मतदानासंदर्भात वक्तव्य केले होते. तसेच सीआरपीएफविरोध विद्रोह करण्याचे आवाहन लोकांना केल्याचा आरोप भाजपने केला होता. त्यानुसार निवडणूक आरोगाने ममतांना नोटीस बजावली होती. आज आयोगाने ममतांवर कारवाईचा निर्णय घेतला. त्यानुसार ता. 12 एप्रिल रोजी रात्री 8 वाजल्यापासून ता. 13 एप्रिल रोजी रात्री 8 वाजेपर्यंत अशी 24 तास ममतांना प्रचारास मनाई करण्यात आली आहे. निवडणूक आयोगाच्या या निर्णयामुळे ममतांना मोठा झटका बसला आहे. 

दरम्यान, कूचबिहारमधील घटनेनंतर ममतांनी तिथे जाण्याची घोषणा केली होती. पण निवडणूक आयोगाना त्यांना तिथे जाण्यापासून रोखले आहे. त्यावर टीका करताना ममतांनी निवडणूक आयोगावरच निशाणा साधला आहे. ''निवडणूक आयोगाचे नाव बदलून एमसीसी म्हणजे मोदी कोड अॅाफ कंटक्ट करायला हवे. भाजपने संपूर्ण ताकद पणाला लावली आहे. पण मला आपल्या लोकांसोबत उभे राहण्यापासून आणि त्यांच्या दु:खात सहभागी होण्यापासून कोणी रोखू शकत नाही,'' असे ट्विट ममतांनी केले आहे. 

निवडणूक आयोगाने कूचबिहारमध्ये जाण्यापासून तीन दिवस नेत्यांना मनाई केली आहे. रविवारी तृणमूलने ममता बॅनर्जी  तिथे जाणार असल्याची घोषणा केली होती. निवडणूक आयोग आपल्याला केवळ तीन दिवस थांबवू शकतो. पण चौथ्या दिवशी मी माझ्या लोकांपर्यंत पोहचणार, असेही ममतांनी स्पष्ट केले आहे. त्यावरून वाद निर्माण होण्याची शक्यता व्यक्त केली जात आहे. 

Edited By Rajanand More

अधिक राजकीय बातम्यांसाठी सरकारनामा अॅप डाऊनलोड करा
Play Store    App Store

संबंधित लेख