नवी दिल्ली : देशाचे सरन्यायाधीश एन. व्ही. रमणा (CJI N. V. Ramana) काही वेळापूर्वी पंतप्रधान नरेंद्र मोदी (PM Narendra Modi) यांच्या निवासस्थानी पोहचले आहेत. पंतप्रधानांच्या अध्यक्षतेखालील एका समितीची बैठक होणार आहे. लोकसभेतील विरोधी पक्षनेते अधिर रंजन चौधरी या समितीमध्ये असून तेही पंतप्रधानांच्या निवासस्थानी दाखल झाले आहेत. (Chief Justice at PM Modis house to select next CBI Director)
केंद्रीय अन्वेषण (CBI) विभागाच्या संचालकांची निवड या बैठकीत केली जाणार आहे. समितीमध्ये सुमारे १०० वरिष्ठ IPS अधिकाऱ्यांच्या नावावर चर्चा केली जाणार आहे. हे अधिकारी १९८४ ते १८८७ च्या तुकडीतील आहेत. नवीन सीबीआय संचालकांच्या निवडीला जवळपास चार महिन्यांचा विलंब झाला आहे. अखेर आज पंतप्रधानांच्या अध्यक्षतेखाली ही बैठक होत आहे.
कोण होऊ शकतात सीबीआयचे संचालक?
आसाम-मेघालय केडरचे १९८४ तुकडीचे आयपीएस अधिकारी वाय. सी. मोदी यांचे नाव चर्चेत आहे. ते राष्ट्रीय तपास यंत्रणेचे महासंचालक आहेत. सीमा सुरक्षा दलाचे महासंचालक व गुजरात केडरचे अधिकारी असलेले राकेश अस्थाना आणि इंडो-तिबेटियन बॅार्डर पोलिसचे महासंचालक एस. एस. देसवाल यांचीही नावे चर्चेत आहेत. त्याचप्रमाणे उत्तर प्रदेशचे पोलिस महासंचालक एच. सी. अवस्थी, केरळचे महासंचालक लोकनाथ बहेरा, रेल्वे सुरक्षा दलाचे महासंचालक अरूण कुमार आणि केंद्रीय औद्योगिक सुरक्षा दलाचे महासंचालक एस. के. जैसवाल यांच्या नावावर विचार होण्याची शक्यता आहे.
सीबीआय संचालकांची निवड सर्वात वरिष्ठ, अनुभव व निष्ठा याआधारे केली जाते. तसेच भ्रष्टाचारविरोधी प्रकरणांच्या तपासातील त्यांचा अनुभवही महत्वाचा असतो. १९८४ ते १९८७ च्या तुकडीतील वरिष्ठ अधिकाऱ्यांच्या यादीतील १०० अधिकाऱ्यांचा त्यासाठी विचार केला जाईल. या चाळणीतून सीबीआयच्या पुढील संचालकांची निवड केली जाईल. पदावर निवड झाल्यानंतर ते अधिकारी किमान दोन वर्षे संचालक म्हणून काम करू शकतात.
दोन वर्षांचा कालावधी पूर्ण झाल्यानंतर आर. के. शुक्ला हे फेब्रुवारी महिन्यात सीबीआयच्या संचालक पदावरून निवृत्त झाले आहेत. त्यानंतर सीबीआयचे वरिष्ठ अतिरिक्त संचालक प्रविण सिन्हा यांच्यावर संचालक पदाचा अतिरिक्त कार्यभार सोपवण्यात आला आहे. नवीन पुर्णवेळ संचालकांची निवड झाल्यानंतर त्यांच्याकडे पदभार सोपवला जाईल.
Edited By Rajanand More
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.