रायपूर : भाजपच्या सरपंचाने नवविवाहित पत्नीसोबत सरकारी हेलिकॉप्टरमध्ये फोटोशूट केल्याचे समोर आले आहे. हा प्रकार समोर आल्यानंतर एका कर्मचाऱ्याला निलंबित करण्यात आले आहे. तसेच या प्रकरणाच्या चौकशीसाठी नागरी विमान वाहतूक विभागाने तीन सदस्यीय समिती स्थापन केली आहे.
छत्तीसगडमधील जशपूर येथील ढोंढी बाहर गावचे सरपंच संकेत साय यांचा काही दिवसांपूर्वीच विवाह झाला आहे. साय यांनी रविवारी पोलिस लाईनमध्ये असलेल्या सरकारी हेलिकॉप्टरमध्ये पत्नीसोबत फोटोशूट केले. अधिकाऱ्यांच्या म्हणण्यानुसार, वाहन चलाक योगेश्वर साय हा दोघांना तिथे घेऊन गेला होता. त्यानंतर बराच वेळ फोटोशूट सुरू होते. पण त्यावेळी कोणत्याही अधिकाऱ्याने त्यावर आक्षेप घेतला नाही. फोटोशूटमधील काही फोटो समोर आल्यानंतर या प्रकार उघडकीस आला.
सरकारी हेलिकॉप्टर ठेवण्याची निश्चित जागा आहे. तिथे कोणालाही अनधिकृतपणे प्रवेश करता येत नाही. पण तरीही तिथे फोटोशूट झाल्याने नागरी विमान वाहतूक विभाग व हेलिकॉप्टर सुरक्षा विभागात खळबळ उडाली आहे. तसेच हेलिकॉप्टरच्या सुरक्षेवरही प्रश्नचिन्ह निर्माण झाले आहे.
हा प्रकार समोर आल्यानंतर काँग्रेसचे प्रदेश सचिव आणि प्रवक्ते विकास तिवारी यांनी नागरी विमान वाहतूक विभागाकडे तक्रार केली आहे. त्यानंतर विभागाचे संचालक नीलम नामदेव एक्का यांनी कॅप्टन पंकज जयस्वाल यांच्या अध्यक्षेखाली तीन सदस्यांची समिती स्थापन केली. ही समिती सात दिवसांत अहवाल सादर करले.
पोलिस लाइन विभागाचे चालक योगेश्वर साय यांनीच दोघांना हेलिकॉप्टरपर्यंत पोहचले. त्यामुळे त्यांना निलंबित करण्यात आले आहे. तसेच चौकशी अहवाल आल्यानंतर दोषींवरही कारवाई केली जाईल, असेही एक्का यांनी स्पष्ट केले.
दरम्यान, संकेत साय हे भाजपाचे माजी आमदार व जशपूरचे जिल्हाध्यक्ष रोहित साय यांचे भाचे आहेत. संकेत यांची आई सुशीला साय या पंचायत समिती सदस्य आहेत. तर संकेत हा जशपूर जिल्ह्यातील ढोंढी बाहर गावचा सरपंच आहे. योगेश्वर सायही त्यांचा नातेवाईक आहे. या ओळखीतूनच सरकारी हेलिकॉप्टरमध्ये फोटोशूट झाल्याचे सांगितले जात आहे.
Edited By Rajanand More
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.