अयोध्या : ऐतिहासिक आणि भव्य-दिव्य अशा राममंदिराच्या भूमिपूजन समारंभासाठी अवघी अयोध्या नगरी सजली आहे. शरयू तीर भगव्या रंगामध्ये न्हाऊन निघाला आहे. पंतप्रधान नरेंद्र मोदी यांच्या उपस्थितीत आज (ता. ५) राम मंदिराच्या भूमिपूजनाचा कार्यक्रम होत आहे. या कार्यक्रमासाठी योगगुरु रामदेवबाबा अयोध्येत दाखल झाले आहेत. त्यांनी आता देशात रामराज्याची स्थापना होण्यास सुरूवात झाल्याचे म्हटले आहे.
पंतप्रधान नरेंद्र मोदी यांच्या स्वागतासाठी पाच हजार शंभर एवढे कलश तयार करण्यात आले आहेत. त्यातील काही कलशांचा वापर हा प्रत्यक्ष विधीप्रसंगी केला जाणार आहे. काही कलश हे पंतप्रधानांचा ताफा ज्या मार्गावरून जाईल त्याभोवती ठेवले जातील. या सोहळ्याच्या पार्श्वभूमीवर अयोध्येमध्ये कडेकोट बंदोबस्त ठेवण्यात आला आहे. या कार्यक्रमाच्या निमित्ताने पंतप्रधान मोदी हे तीन तास अयोध्यानगरीमध्ये असतील. या कार्यक्रमाच्या पार्श्वभूमीवर अयोध्येसह लगतच्या भागांमध्ये कडेकोट बंदोबस्त तैनात करण्यात आला आहे.
बाहेरील कोणत्याही व्यक्तीस शहरामध्ये प्रवेश दिला जाणार नाही. मंदिराच्या या भूमिपूजन कार्यक्रमासाठी १७५ मान्यवरांना निमंत्रण दिले असून, त्यात १३५ संतांचा समावेश आहे. मंचावर पंतप्रधान नरेंद्र मोदी यांच्या व्यतिरिक्त पाचजण असतील. मोदींच्या हस्ते यावेळी ४० किलो वजनाच्या चांदीच्या कोनशिलेचे लोकार्पण करण्यात येईल. या सोहळ्यानिमित्त अयोध्येत ५१ हजार लाडूंचे वाटप होणार असून, भूमिपूजनात सहभागी पाहुण्यांना चांदीचा शिक्का भेट देण्यात येईल. शरयू नदीच्या तीरावर काल सायंकाळी रोषणाई करण्यात आली होती.
या कार्यक्रमासाठी रामदेवबाबा आज अयोध्येत दाखल झाले आहेत. ते रामजन्मभूमी स्थळी पोचले आहेत. आता देशात खरी रामराज्याची स्थापना होईल, अशी भावना त्यांनी व्यक्त केली. ते म्हणाले की, आपण राम मंदिराचा कार्यक्रम पाहत आहोत, ही सर्वच भारतीयांसाठी भाग्याची घटना आहे. अयोध्येत आता पतंजली योगपीठ भव्य असे गुरुकुल उभारणार आहे. या ठिकाणी जगभरातून येणारे लोक वेद आणि आयुर्वेदाचा अभ्यास करु शकतील.
पंतप्रधान नरेंद्र मोदी यांचा अयोध्या दौरा
११.४०: हनुमान गढी येथे दहा मिनिटे दर्शन आणि पूजा
१२.००: राम जन्मभूमी येथे पोचणार
१२.१० : रामलल्ला विराजमानचे दर्शन आणि पूजा
१२.१५: रामलल्ला परिसरात पारिजात रोपट्याचे रोपण
१२.३०: भूमिपूजनाच्या कार्यक्रमाला सुरवात
१२.४०: राम मंदिर भूमिपूजन कोनशिलेची स्थापना
२.०५: साकेत महाविद्यालयाकडे प्रयाण
२.२० : हेलिकॉप्टरने लखनौकडे रवाना
कडेकोट बंदोबस्त
- अयोध्येची सुरक्षा एसपीजीकडे
- शहराच्या सगळ्या सीमा सील
- बाहेरच्या व्यक्तींनी प्रवेश नाही
- स्थानिकांना ओळखपत्र अनिवार्य
- सर्वच भागांवर ड्रोनची नजर
Edited by Sanjay Jadhav
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.