नवी दिल्ली : शेतकऱ्यांच्या आंदोलना दरम्यान काल शेतकऱ्यांना चिथावणी देण्याचा आरोप पंजाबी अभिनेता दीप सिद्धूवर होत आहे. दीप सिद्धू हा भारतीय जनता पक्षाचा कार्यकर्ता असल्याचा आरोप भारतीय किसान युनियनचे नेते राकेश टिकैत यांनी केला आहे.
दोन महिन्यांच्या शांततापूर्ण आंदोलनानंतर काल दिल्लीत शेतकऱ्यांच्या ट्रॅक्टर रॅलीला हिंसक वळण लागले. या रॅलीदरम्यान झालेल्या प्रकरणात पोलिसांनी बावीस गुन्हे दाखल केले आहेत.दिल्लीत काही भागात शेतकरी आंदोलनाला काल हिंसक वळण लागले. पोलिसांनी लावलेली बॅरिकेड्स तोडून शेतकरी दिल्लीत घुसल्याने पोलिसांना लाठीचार्ज करावा लागला. तसेच अश्रूधुराच्या नळकांड्या फोडून आंदोलकांना पांगवावे लागले. पण शेतकरी आक्रमक झाल्याने पोलिसांच्या अंगावर ट्रॅक्टर घालण्याचाही प्रयत्न करण्यात आला. याच दरम्यान एका पलटी झालेल्या ट्रॅक्टरखाली शेतकरी अडकला. पण त्याचा जागेवर मृत्यू झाला होता.
या आंदोलना दरम्यान काही शेतकरी ट्रॅक्टर घेऊन लाल किल्ला परिसरात पोहचले. लाल किल्ल्यावर चढून त्यांनी तिरंग्या व्यतिरिक्त अन्य ध्वज फडकावला. त्यावरून आता शेतकरी आंदोलकांवर टीका होत आहे. जे शेतकरी काल लाल किल्ल्यावर गेले त्यांच्यात दीप सिद्धूचाही समावेश होता. शेतकऱ्यांना वास्तविक लाल किल्ल्यावर जायचे नव्हते. मात्र, दीप सिद्धूनेच त्यांना भडकावले, असा आरोप भारतीय किसान युनियनचे हरयाणा विभागाचे प्रमुख गुरनामसिंग चौधरी यांनी केला आहे.
दुसरीकडे दीप सिद्धूने शेतकऱ्यांची बाजू सावरुन घेण्याचा प्रयत्न केला आहे. लाल किल्ल्यावर गेलेल्या शेतकऱ्यांनी राष्ट्रध्वज काढला नाही. आम्ही आमचा निषेध व्यक्त करण्यासाठी केवळ निशाण साहिब आणि शेतकरी आंदोलनाचा झेंडा फडकवला, असा दावा त्याने केला आहे. या आंदोलक शेतकऱ्यांना दहशतवादी ठरवू नये, किंवा त्यांच्या हेतूला जातीय रंग देऊ नये, असेही आवाहन त्याने केले आहे.
दीप सिद्धूचा जन्म हरयाणातील मुक्तसर येथे १९८४ मध्ये झाला. तो कायदा शाखेचा पदवीधर आहे. किंगफिशर माॅडेल हंट स्पर्धेत विजयी होण्यापूर्वी त्याने काही काळ वकिलीही केली. त्याचा पहिला पंजाबी चित्रपट 'रमता जोगी' २०१५ मध्ये प्रसारित झाला. २०१८ मध्ये 'जोरा दास नंबरिया' प्रसारित झाल्यानंतर त्याला प्रचंड लोकप्रियता मिळाली. २०१९ मध्ये गुरुदासपूरचे भाजप खासदार व अभिनेते सनी देओल यांच्या निवडणुकीचा प्रचारही त्याने केला होता.
Edited By - Amit Golwalkar
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.