मुंबई : बॉलीवूड अभिनेता सुशांतसिंग राजपूतचा व्हिसेरा अहवाल (आज) शुक्रवारी मिळणार आहे. त्यामुळे त्याच्या मृत्यूबाबतचे गूढ लवकरच उकलण्याची शक्यता आहे. अहवालाच्या आधारे केंद्रीय गुन्हे अन्वेषण विभाग (सीबीआय) पुढील तपास करणार असल्याची माहिती विश्वसनीय सूत्रांनी दिली. सुशांतच्या मृत्यू प्रकरणाचा तपास करणारे सीबीआयचे एक पथक मुंबईहून दिल्लीला पोहोचले आहे.
सुशांतसिंग राजपूतचा व्हिसेरा अहवाल मिळाल्यानंतर तो मेडिकल बोर्डाच्या बैठकीत सादर केला जाणार आहे. तसेच एम्सच्या डॉक्टरांचे एक पॅनेल या प्रकरणी एक बैठक करणार असून व्हिसेरा अहवालाबरोबरच त्याच्या शवविच्छेदन अहवालाबाबत देखील चर्चा केली जाणार आहे.
रिया आणि तिचा भाऊ शौविकला अटक केल्यानंतर बॉलीवूडमधील अमली पदार्थ पुरवठ्याचे प्रकरण समोर आले आहे. अमली पदार्थ प्रकरणी अभिनेत्री रिया चक्रवर्ती आणि शौविक चक्रवर्ती यांच्याकडून एनसीबीच्या चौकशीत धक्कादायक माहिती मिळाली आहे. रिया आणि शोविक यांच्या मोबाईल चॅटमधून अमली पदार्थासंदर्भात मोठी नावे समोर आल्याची माहिती एनसीबीच्या पथकाला मिळाली आहे. त्यानुसार एनसीबीने गुरुवारी मुंबईत अनेक ठिकाणी छापे टाकले. यामध्ये मोठ्या प्रमाणात अमली पदार्थ, तसेच तस्कराना एनसीबीने ताब्यात घेतल्याचे सूत्रांनी सांगितले.
कलाकारांचा आक्षेप
सुशांतसिंग मृत्यू प्रकरणात एनसीबीने रियाला अटक केल्यानंतर शांत असलेले बॉलीवूड कलाकार अचानक तिच्या समर्थनात मैदानात उतरले आहेत. रिया सोबतचा माध्यमांचा व्यवहार पाहून हे सर्व एकजूट झाले आहेत. बॉलीवूडमधील काही कलाकारांनी माध्यमांना एक खुले पत्र लिहिले आहे. यात त्यांनी स्वाक्षरी करून सुशांतसिंग राजपूत मृत्यू प्रकरणात सुरू असलेल्या चौकशीत रियाला दिल्या जाणाऱ्या वागणुकीवर आक्षेप नोंदविला आहे.
Edited By - Amit Golwalkar
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.