कमलनाथ हे कोरोनापेक्षा मोठं संकट; शिवराजसिंह चौहानांची जीभ घसरली

भोपाळ :  राज्यातील कोरोनाच्या संकटापेक्षा काँग्रेस नेते कमलनाथ हे मोठे संकट आहेत,  असे वादग्रस्त वक्तव्य मध्य प्रदेशचे मुख्यमंत्री शिवराजसिंह चौहान यांनी केले आहे. कमलनाथ यांच्याविषयी बोलताना चौहान यांची जीभ घसरली असून, यावरुन त्यांच्यावर टीका होऊ लागली आहे. याआधी महाराष्ट्रातील भाजपचे विधान परिषदेवरील नवनिर्वाचित आमदार गोपीचंद पडळकर यांचीही राष्ट्रवादी काँग्रेसचे अध्यक्ष शरद पवार यांच्याविषयी बोलताना जीभ घसरली होती. 

राज्यात तीन महिन्यांपूर्वी ज्योतिरादित्य शिंदे यांनी काँग्रेस सोडून भाजपमध्ये प्रवेश केला होता. त्यावेळी शिंदे यांच्यासमवेत काँग्रेसचे 23 आमदार भाजपमध्ये गेले होते. त्यामुळे कमलनाथ यांच्या नेतृत्वाखालील काँग्रेसचे सरकार पडले होते. त्यानंतर पुन्हा मुख्यमंत्रिपदाची धुरा शिवराजसिंह चौहान यांनी हाती घेतली होती. चौहान यांच्या सरकारला आज 100 दिवस पूर्ण झाल्यानिमित्त व्हर्च्युअल रॅलीचे आयोजन करण्यात आले होते. या वेळी बोलताना चौहान यांनी कमलनाथ यांच्याविषयी वादग्रस्त वक्तव्य केले. 

चौहान म्हणाले की, राज्यातील कोरोना संकटाशी लढण्यास कमलनाथ सक्षम होते का? मध्य प्रदेशात ते कोरोनापेक्षा मोठे संकट आहेत. आपल्या सरकारने या संकटाला योग्य पद्धतीने हाताळले आहे. राज्यातील गरीब नागरिकांच्या खात्यात विविध योजनांतर्गत 40 हजार कोटी रुपये जमा करण्यात आले आहेत. हा पैसा काय कमलनाथ यांनी जमा केला आहे का? कमलनाथ यांनी राज्यातील सर्व कल्याण योजना बंद केल्या आहेत. 

या संकटाच्या काळात शेतमाल खरेदी करण्याची आम्ही व्यवस्था केलेली आहे. कमलनाथ यांनी शेतकऱ्यांची फसवणूक केली आहे. कमलनाथ यांनी पीक विम्याचा हप्ताही भरला नाही. मी राज्यात सरकार स्थापन केल्यानंतर तातडीने पीक विम्याचा हप्ता भरला. याचबरोबर शेतकऱ्यांच्या खात्यात पीक विम्याचे 2 हजार 990 कोटी रुपयांचे खात्यात जमा केले आहेत, असे चौहान यांनी सांगितले.  

चौहान यांच्या विधानावर विविध क्षेत्रांतून तीव्र प्रतिक्रिया उमटत आहेत. राज्यातील सत्ता मिळूनही चौहाना यांचे समाधान झाले नसून, ते विरोधकांवर खालच्या पातळीवरील टीका करीत आहेत, असा टोलाही विरोधकांनी लगावला आहे. चौहान यांनी या प्रकरणी माफी मागावी, अशी मागणीही जोर धरु लागली आहे.