सुशांतच्या आत्महत्येप्रकरणी चौकशीसाठी अभिनेत्री हजर झाली आई अन् वकिलासमवेत

मुंबई : अभिनेता सुशांतसिंह राजपूत याच्या आत्महत्येमागील नेमक्या कारणाचा पोलीस शोध घेत आहेत. सुशांत याचा शेवटचा चित्रपट 'दिल बेचारा' हा होता. या चित्रपटातील त्याची सहकलाकार संजना संघी हिची पोलिसांनी चौकशी केली असून, तिचा जबाब नोंदविला आहे, अशी माहिती सूत्रांनी दिली. 

सूत्रांनी दिलेल्या माहितीनुसार, सुशांत याचा शेवटचा चित्रपट दिल बेचारा हा होता. या चित्रपटात त्याच्यासोबत संजना संघी ही होती. पोलिसांनी तिला चौकशी बोलाविले होते. ती तिच्या आई आणि वकिलासोबत चौकशीसाठी हजर झाली होती. पोलिसांनी तिची चौकशी करुन जबाब नोंदविला आहे. या प्रकरणी सुशांतसोबत काम केलेल्या इतरही सहकलाकारांनी चौकशीसाठी बोलाविण्यात येणार आहे. 

सुशांतच्या आत्महत्येमागील सर्व कारणे पडताळली जात आहेत. या प्रकरणात आतापर्यंत 28 जणांचे जबाब नोंदवण्यात आले आहेत. या प्रकरणी काही नवीन माहिती समोर आल्याने सुशांतच्या कुटुंबीयांना पुन्हा जबाब नोंदवण्यासाठी बोलावण्यात येणार आहे. सुशांतचा अंतिम शवविच्छेदन अहवाल नुकताच मिळाला आहे. गळफास घेतल्यानेच सुशांतचा मृत्यू झाल्याचे या अहवालावरून स्पष्ट झाले आहे. मुंबई पोलीस या प्रकरणाचा कसून तपास करत आहेत. 

सुशांतच्या शवविच्छेदन अहवालालात त्याचा मृत्यू हा गळफास घेतल्याने झाल्याचे नमूद केले आहे. या अहवालावर अंधेरीतील कूपर रुग्णालयातील पाच डॉक्‍टरांनी स्वाक्षरी केली आहे. शवविच्छेदन अहवालानुसार, त्याच्या शरीरावर कोणत्याही जखमा दिसून आल्या नाहीत. दरम्यान, सुशांतने कुठले विषारी द्रव्य किंवा पदार्थ खाल्ला होता का याचीही तपासणी करण्यात आली होती. प्रयोगशाळेकडून त्याबाबतचा अहवाल मिळाला असून, त्याने कोणताही विषारी पदार्थ मृत्यूआधी खाल्लेला नसल्याचे स्पष्ट झाले आहे. 

सुशांतची मैत्रीण रिया चक्रवर्ती हिलाही पुन्हा चौकशीसाठी बोलावण्यात येणार असल्याची माहितीही  सूत्रांनी दिली आहे. सुशांत याच्या आत्महत्येचे गूढ अद्याप उलगडले नसून त्याबाबत वांद्रे पोलिसांकडून कसून तपास सुरू आहे. सोशल मीडियासह सर्वसामान्यांमध्ये सुशांतच्या आत्महत्येबाबत वेगवेगळे तर्क, अंदाज वर्तविले जात आहेत. सुशांतच्या आत्महत्येसंदर्भात सोशल मीडियावर कोणतीही अफवा पसरविणारी माहिती पसरवू नये, असे आवाहन पोलिसांनी केले आहे.