दोन्ही काँग्रेसची प्रदेशाध्यक्षपदे साताऱ्यात!

पुणे: राज्याचे नेतृत्व करणारा जिल्हा अशी ओळख असणाऱ्या सातारा जिल्हयात यावेळी सत्तेतील दोन प्रमुख पक्षांची प्रदेशाध्यक्षपदे येण्याची शक्यता आहे. काँग्रेसचे प्रदेशाध्यक्षपद पृथ्वीराज चव्हाण यांच्याकडे तर राष्ट्रवादीचे प्रदेशाध्यक्षपद शशिकांत शिंदे यांना मिळू शकते.

पृथ्वीराज चव्हाण यांचा कऱ्हाडचे खासदार ते कऱ्हाडचे आमदार असा प्रवास झाला आहे. 2010 ते 2014 याकाळात राज्याचे मुख्यमंत्रीपद त्यांनी सांभाळले. आता ते कऱ्हाड दभिणमधून आमदार आहेत. त्यांच्या नावाची मंत्रीपदासाठी चर्चा सुरू असलीतरी त्यांनी संघटनेचे काम सोपवले जाण्याची शक्यता अधिक आहे. काँग्रेसचे सर्व प्रमुख नेते मंत्रीमंडळात असतील. त्यामुळे सद्यातरी पृथ्वीराज चव्हाण यांच्याशिवाय दुसरे सक्षम नाव काँग्रेसकडे नाही. 

माथाडी नेते असलेले शशिकांत शिंदे हे राष्ट्रवादीची स्थापना झाल्यापासून आमदार होते. ते पृथ्वीराज चव्हाण यांच्या मंत्रीमंडळात मंत्रीही होते. 1999, 2004 ला ते जावलीतून आमदार झाले. 2009, 2014 मध्य़े ते कोरेगाव मतदारसंघातून निवडून गेले. मात्र आता अत्यल्प मतांनी त्यांचा पराभव झाला. हा पराभव राष्ट्रवादीच्या जिव्हारी लागला आहे. शशिकांत शिंदे हे शरद पवारनिष्ठ म्हणून ओळखले जातात. त्यामुळे त्यांना विधान परिषदेवर घेवून प्रदेशाध्यक्ष बनवले जाणार आहे.