माँसाहेब आणि आदरणीय बाळासाहेब, आज तुम्ही असायला हवे होतात : सुप्रिया सुळेंचे ट्वीट

मुंबई : माँसाहेब आणि आदरणीय बाळासाहेब...! आज तुमची खुप आठवण येतेय. हे सर्व पहायला तुम्ही दोघे असायला हवे होतात.तुम्हा दोघांनी मला मुलीपेक्षाही जास्त प्रेम दिले. तुम्ही माझ्या आयुष्यात स्पेशल होता,आहात आणि रहाल, असे भावनिक ट्वीट राष्ट्रवादी काँग्रेसच्या नेत्या खासदार सुप्रिया सुळे यांनी केले आहे. 

आज सायंकाळी शिवतीर्थावर शिवसेना-राष्ट्रवादी काँग्रेस व काँग्रेस यांच्या सरकारचा शपथविधी होत आहे. शिवसेना पक्ष प्रमुख उद्धव ठाकरे मुख्यमंत्रीपदाची शपथ घेणार आहे. त्या पार्श्वभूमीवर सुप्रिया सुळे यांनी हे ट्वीट केले आहे.पवार आणि ठाकरे कुटुंबिय यांच्यात जिव्हाळ्याचे संबंध होते. त्यामुळे सौ. सुळे यांनी स्व. बाळासाहेब व त्यांच्या पत्नी स्व. मीनाताई यांची आठवण काढली आहे. 

आज सकाळीच सौ. सुळे यांनी ट्वीट करुन नव्या सरकारला शुभेच्छा दिल्या आहेत. आजचा सूर्योदय एका नवा इतिहास रचतोय. महाराष्ट्र विकास आघाडीचे सरकार राज्यात येत आहे.उद्धवजी ठाकरे मुख्यमंत्रीपदाची शपथ घेणार आहेत. देशात महाराष्ट्र पुन्हा एकदा प्रगतीपथावर घेऊन जाण्यासाठी आपण सर्वजण काम करु. अभिनंदन, अशा शब्दात राष्ट्रवादी काँग्रेसच्या नेत्या खासदार सुप्रिया सुळे यांनी नव्या सरकारचे स्वागत केले आहे.