पुणे : राज्यातील सनदी अधिका-यांच्या बदल्या होणार आहेत. त्यामध्ये जिल्हाधिकारी सौरभ राव यांची पुणे महापालिका आयुक्तपदी तर महापालिका आयुक्त कुणाल कुमार यांची पंतप्रधान कार्यालयाच्या 'स्मार्ट सिटी सेल' मध्ये बदली होण्याची शक्यता आहे.
जिल्हाधिकारी राव यांच्याकडे पुरंदर आंतरराष्ट्रीय विमानतळ मार्गी लावण्याची जबाबदारी आहे. राव आणि कुणाल कुमार यांचा तीन वर्षांचा कार्यकाळ पूर्ण झालेला आहे. परंतु, मुदत संपली असली तरी बदली करण्याचे सर्वाधिकार राज्यसरकारला आहेत.
फेब्रुवारी २०१४ मध्ये तत्कालीन जिल्हाधिकारी विकास देशमुख यांची पुणे महापालिकेच्या आयुक्तपदी बदली झाल्यानंतर त्यांच्या जागी नागपूरचे तत्कालीन जिल्हाधिकारी असलेले सौरभ राव यांची नियुक्ती करण्यात आली होती. राव यांनी या पूर्वी सोलापूर आणि नंदूरबारच्या जिल्हाधिकारीपदी काम केलेले आहे. ते गोंदियाच्या जिल्हा परिषदेत मुख्य कार्यकारी अधिकारी पदावरही कार्यरत होते. तसेच वर्धा येथे त्यांनी महसूल खात्यात महत्त्वाच्या पदावर काम केले आहे.
तर आॅगस्ट २०१४ मध्ये पुणे महापालिकेचे आयुक्त विकास देशमुख यांची राज्य सरकारने पुण्याचे विभागीय आयुक्त म्हणून पदोन्नती देऊन बदली केल्यानंतर पुणे महापालिकेच्या रिक्तपदी कुणाल कुमार यांची नियुक्ती करण्यात आली होती. कुणाल कुमार हे १९९९च्या बॅचचे भारतीय प्रशासकीय सेवेतील अधिकारी आहेत.
माळीण प्रकल्प मार्गी लावणे, आषाढी वारी पालखीचे नियोजन पुरंदर विमानतळाचा प्रकल्प मार्गस्थ करण्यामध्ये जिल्हाधिकारी राव यांनी चांगले काम केल्यामुळे मुख्यमंत्री देवेंद्र फडणविस यांच्या 'गुडबुक'मध्ये असल्यामुळे राव यांना चांगल्या ठिकाणी नियुक्ती मिळणार असल्याची चर्चा जिल्हाधिकारी कार्यालयात रंगली आहे.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.