पंढरपूर : धनगर समाजाचा एसटी प्रवर्गात समावेश करून सवलती लागू कराव्यात, या प्रमुख मागणीसाठी येत्या ११ ऑगस्टला पंढरपुरात धनगर समाजाचा राज्यस्तरीय मेळावा घेण्यात येणार आहे. मेळाव्यासाठी काँग्रेस नेत्या प्रियांका गांधी आणि राष्ट्रवादीचे नेते शरद पवार उपस्थित राहणार आहेत, अशी माहिती धनगर समाजाचे नेते आमदार रामहरी रूपनवर आणि माजी मंत्री अण्णासाहेब डांगे यांनी येथे पत्रकार परिषदेत दिली.
पंढरपुरातील रेल्वे मैदानावर सकाळी दहा वाजता हा मेळावा होईल. राज्यभरातून सुमारे दोन लाख समाजबांधव या वेळी उपस्थित राहतील. स्वातंत्र्यानंतरही धनगर समाज अनेक शासकीय योजनांपासून वंचित आहे. धनगर समाजाचा एसटी प्रवर्गात समावेश करावा, ही मागणी केल्या अनेक वर्षांपासून केली जात आहे. सत्ताधारी भाजप-शिवसेना सरकारने धनगर समाजाला आरक्षण देण्याचे आश्‍वासन दिले होते. गेल्या साडेचार वर्षांत सत्ताधारी भाजप-शिवसेनेने धनगर समाजाचा आरक्षणाचा प्रश्‍न सोडवला नाही, उलट सत्तेसाठी वापर करून समाजाची फसवणूक केली आहे. धनगर समाजाचा आक्रोश दाखविण्यासाठी हा मेळावा घेण्यात येणार आहे.
मेळाव्यासाठी राज्यभरातून सुमारे दोन लाख धनगर समाजबांधव उपस्थित राहतील. काँग्रेस नेत्या प्रियांका गांधी आणि राष्ट्रवादीचे नेते शरद पवार यांना निमंत्रित केले आहे, असे ते म्हणाले. या वेळी शालिवाहन कोळेकर, माउली हळणवर, सुभाष मस्के आदी उपस्थित होते. धनगर समाजाच्या विविध मागण्यांसाठी धनगर समन्वय समितीच्या वतीने पंढरपुरात येत्या ९ ऑगस्ट रोजी बेमुदत उपोषण केले जाणार आहे. ९ ऑगस्ट रोजी होणाऱ्या आंदोलनात आम्ही सहभागी होणार आहोत, तेही ११ ऑगस्ट रोजीच्या मेळाव्याला उपस्थित राहणार आहेत, असे आमदार रूपनवर म्हणाले.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.