पंकजा मुंडेंच्या आदेशाचा सन्मान : संगीता ठोंबरे  

केज : ग्रामविकास मंत्री पंकजा मुंडे यांच्या नेतृत्वातच मतदार संघात विकास कामे करता आली. सर्वसामान्य जनता आणि भाजपच्या कार्यकर्त्यांनी नेहमी विकासाला साथ दिली. त्यामुळे पंकजा मुंडे यांच्या आदेशाचा सन्मान असल्याचे भाजप आमदार संगीता ठोंबरे म्हणाल्या.

राष्ट्रवादीची उमेदवारी जाहीर झालेल्या नमिता मुंदडा यांनी सोमवारी पंकजा मुंडे यांच्या नेतृत्वात भाजपात प्रवेश केला. त्यामुळे त्यांना केज मतदार संघातून भाजपची उमेदवारी निश्चित झाली.

त्यामुळे भाजपच्या ठोंबरे समर्थकांमधून नाराजी व्यक्त होत होती. नाराजांची बैठक घेऊन सोमवारी सायंकाळी त्यांनी मार्गदर्शन केले.

श्रीमती ठोंबरे म्हणाल्या, केज मतदार संघातील सामान्य जनता आणि भाजप कार्यकर्त्यांनी नेहमी आपल्याला पाठबळ आणि प्रेम दिले. भविष्यातही या मंडळींची कामे पंकजा मुंडे यांच्या माध्यमातून केली जातील. तसा शब्द त्यांनी दिला आहे.

त्यांच्याकडून आपल्याला भविष्यात चांगली संधी मिळेल असेही त्या म्हणाल्या. पंकजा मुंडेंना अडचणींमुळे आपल्याबाबत हा कटू निर्णय घ्यावा लागला असू शकतो त्यामुळे त्यांच्या निर्णयाचा आपल्याला सन्मान असून कार्यकर्त्यांनीही या निर्णयाचा आदर करावा, असेही आमदार संगीता ठोंबरे म्हणाल्या.