थोरातांविरूद्ध दिल्लीला गेलेले 'ते' पत्र भाजपहस्तकांनीच लिहले! 

संगमनेर (नगर) : काँग्रेसचे प्रदेशाध्यक्ष बाळासाहेब थोरात यांनी संगमनेरमधील मुस्लिम समाजाची फसवणूक केल्याबाबतचे 'ते' पत्र केवळ राजकीय आकसापोटी भाजपहस्तकांनी लिहिल्याचा आरोप काँग्रेसच्या अल्पसंख्यांक सेलचे अध्यक्ष अनिल शेख यांनी केला आहे. याबाबत त्यांनी एक पत्रक प्रसिद्धीस दिले आहे.

विधानसभा निवडणुकीच्या निकालानंतर राज्यातील राजकीय समिकरणे बदलली आहेत. काँग्रेस, शिवसेना व राष्ट्रवादी पक्ष एकत्र येऊन स्थिर सरकार देण्यासाठी प्रयत्नशिल असल्याने, सत्तेसाठी पक्षांतर केलेल्यांचे मनसुबे धुळीला मिळाले आहेत. या पार्श्वभुमिवर त्यांच्या इशाऱ्यावर संगमनेरातील भाजपाच्या हस्तकांनी प्रदेशाध्यक्ष आमदार बाळासाहेब थोरात यांनी मुस्लीम समाजाची तथाकथीत फसवणूक केल्याचे पत्र, मुस्लीम समाजाच्या काही युवकांच्या सह्यांनिशी सोनिया गांधी यांना पाठवले होते. यातून संगमनेरातील मुस्लीम समाजाची निष्कारण बदनामी होत असल्याचे शेख यांनी म्हटले आहे.

संगमनेरातून रवाना झालेले हे पत्र संशोधनाचा विषय आहे. शहरातून जाणाऱ्या कोल्हेवाडी रस्त्याच्या रखडलेल्या दुरुस्तीसाठी या सह्यांची मोहिम असल्याचे सांगत, एका मुस्लीम नेत्याने या परिसरातील व्यावसायीकांच्या सह्या घेत, त्यांचा वापर या निवेदनासाठी केल्याचे एका युवकाने काल सांगितले होते. यावरील अनेक सह्या व मोबाईल क्रमांकही चुकीचे असल्याचे पडताळणीत उघड झाले आहे. त्यामुळे हा पूर्ण राजकीय डाव असून, त्याकडे विशेष लक्ष देण्यासारखे काही नाही.