रत्नागिरीत सेनेला अस्मान दाखविण्यासाठी नारायण राणेंना साकडे

रत्नागिरीत सेनेला अस्मान दाखविण्यासाठी नारायण राणेंना साकडे

रत्नागिरी:  पालिकेच्या नगराध्यक्षपदाच्या पोटनिवडणुकीसाठी जोरदार मोर्चेबांधणी सुरू झाली आहे. शिवसेनेचे संभाव्य उमेदवार बंड्या साळवी यांना शह देण्यासाठी सर्वपक्षीय एकत्र येणार आहेत. थेट कोकणचे नेते नारायण राणे यांच्याबरोबरही बैठका झाल्याचे खात्रीलायक वृत्त आहे. उमेदवार कोण आणि कोणत्या चिन्हावर निवडणूक लढणार, यासाठी चर्चा सुरू झाल्या आहेत. त्यासाठी राजेश सावंत, मिलिंद कीर, बाळा मयेकर, नित्यानंद दळवी आदींची नावे चर्चेत आहेत.

जनतेतून थेट निवडून दिलेले शिवसेनेचे नगराध्यक्ष राहुल पंडित यांनी पदाचा राजीनामा दिला. पक्षांतर्गत अडीच वर्षांच्या धोरणामुळे त्यांनी हा राजीनामा दिला आहे. जनतेवर ही लादलेली निवडणूक असल्याचे सांगत विरोधक एकत्र आले आहेत. राष्ट्रवादी कॉंग्रेस, कॉंग्रेस, मनसे, महाराष्ट्र स्वाभिमान पक्ष एकत्र येणार असल्याची चर्चा आहे. यापूर्वी कुवारबाव ग्रामपंचायत निवडणुकीत हा फॉर्म्युला वापरला होता. तिथे यश मिळाल्यानंतर नगराध्यक्ष पोटनिवडणुकीतही तो वापरण्याचा प्रयत्न सुरू आहे.

शिवसेना शहरवासीयांना वेठीस धरत आहे. वैयक्तिक स्वार्थासाठी ही पोटनिवडणूक लादण्यात आली आहे, असे आरोप विरोधकांकडून सुरू आहेत. पोटनिवडणुकीसाठी थेट कोकणचे नेते नारायण राणे यांच्याशी बैठक झाल्याची माहिती सुदेश मयेकर यांनी दिली. तसेच अन्य पक्षाच्या लोकांशी आमची चर्चा सुरू आहे. प्राथमिकदृष्ट्या माजी उपनगराध्यक्ष राजेश सावंत, माजी नगराध्यक्ष मिलिंद कीर, शेट्ये घराण्यातील एक, नित्यानंद दळवी किंवा माजी उपनगराध्यक्ष बाळा मयेकर यांची नावे चर्चेत आहेत. कॉंग्रेसचा हात की राष्ट्रवादीचे घड्याळ, स्वाभिमानचे चिन्ह, या कोणत्या चिन्हावर लढायचे, हे निश्‍चित झालेले नाही. मात्र, एकत्र येऊन निवडणूक लढण्याचा प्रयत्न सुरू आहे.

भाजपच्या भूमिकेमुळे संभ्रम
शिवसेना-भाजप युती म्हणून या पोटनिडणुकीला सामोरे जाणार आहेत; परंतु भाजपच्या नगरसेवकांची एक भूमिका आणि जिल्हाध्यक्ष बाळ माने यांची वेगळी भूमिका दिसत आहे. पोटनिवडणूक स्वबळावर लढविणार असल्याचे माने यांनी एका खासगी पोर्टलला स्पष्ट केले होते. तर युती म्हणून आगामी निवडणुकांना आम्ही एकत्रित सामोरे जाणार, असे भाजप नगरसेवकांचे म्हणणे आहे. 

Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुकट्विटरइन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.

Related Stories

No stories found.
Sarkarnama News
sarkarnama.esakal.com