शाळा सुरू होणार! आरोग्यमंत्री टोपेंनीच सांगितली तारीख

जालना : गेल्या काही दिवसांपासून राज्यातील कोरोनाबाधितांची (Covid-19) संख्या कमी होत असल्याने पुन्हा एकदा शाळा (School Open) उघडण्याचा निर्णय राज्य सरकारकडून (State Government) घेण्यात येण्याची शक्यता आहे. कोरोनाचा संभाव्य धोका पहाता शाळा सुरू करायची की नाही याबाबत निर्णय घेण्याचे अधिकार हे जिल्हा प्रशासनाला देण्यात आले आहेत. त्यामुळे काही जिल्ह्यात शाळा सुरू झाल्या असून काही जिल्ह्यात अद्यापही शाळा सुरू करण्यासाठी परवानगी देण्यात आलेली नाही. मात्र, मागील काही दिवसांमध्ये कोरोना रुग्ण कमी झाल्याने शाळा उघडण्यात आल्या आहेत. तर, काही ठिकाणी अजूनही शाळा बंदच आहेत. याबाबत आता राज्याचे आरोग्यमंत्री राजेश टोपेंनी (Rajesh Tope) सुचक वक्तव्य करत विद्यार्थ्यांचे शैक्षणिक हित लक्षात घेऊन पहिली ते पाचवी पर्यंतचे वर्ग 1 फेब्रुवारी पासून सुरु करण्याचा राज्य सरकारचा मानस असल्याचे म्हटले आहे. ते जालन्यात बोलत होते.

टोपे म्हणाले, ब्रिटन आणि फ्रांसच्या प्रधानमंत्र्यानी आता आपल्याला कोरोना बरोबर राहायचे आहे, असे म्हटले आहे. त्यामूळे या राष्ट्रापासून बोध घेऊन आगामी काळात टास्क फोर्स आणि केंद्र सरकारच्या सुचनाचे पालन केले जाईल, असे टोपे म्हणाले.

राज्य, समाज आणि स्वतःच्या सुरक्षीततेसाठी नागरीकांनी दुसऱ्या डोसचे लसीकरण करून घ्यावे, असे आवाहन देखील टोपेंनी केले आहे. कोरोनामुळे राज्याच्या तिजोरीवर आर्थिक ताण आल्याची कबुलीही टोपेंनी यावेळी दिली आहे. कोरोनामुळे निर्बंध लावण्यात आल्याने उद्योजकांना नुकसान होतय. मात्र, महसूल देखील कमी प्रमाणात जमा होत असल्याचे त्यांनी सांगितले आहे. नागरीकांनी कोरोना लसीकरण करत कोरोना नियमांचे पालन केल्यास आपण लवकर कोरोनावर मात करू असा, विश्वास देखील त्यांनी व्यक्त केला.