धक्कादायक : विजेचे बिल आले ४० हजार, अन त्यांनी केली आत्महत्या

नागपूर : एका सामान्य माणसाच्या घराचे वीज बिल किती असावे, याचा अंदाजही न घेता महावितरणकडून विजेची बिले पाठवणे सुरू आहे. रोज कुठे ना कुठे वीज बिलासाठी आंदोलने सुरू आहेत. यशोधरानगर मध्ये राहणारे लीलाधर लक्ष्मण गायधने यांना थोडेथोडके नव्हे, तर तब्बल ४० हजार रुपयांचे बिल पाठवण्यात आले. बिल पाहताच त्यांना धक्का बसला. वारंवार महावितरण कार्यालयाच्या चकरा मारुनही बिल कमी न केल्यामुळे व्यतिथ होऊन शेवटी त्यांनी मृत्युला कवटाळे. 

लॉकडाउनच्या काळात अवाजवी भरमसाठ वीजबिल पाठविण्यात आल्याची ओरड चांदा ते बांदा सुरू आहे. त्यातच बिल विषयक तक्रारींची दखलच घेतली जात नसल्याने जनमानस प्रक्षुब्ध आहे. वाढीव बिलाचा महावितरणने दिलेला शॉक आणि दुर्लक्षित कारभारानेच लीलाधर यांनी जाळून घेऊन आत्महत्या केल्याचे त्यांच्या आप्तेष्टांनी सांगितले. शनिवारी यशोधरानगरात घडलेल्या या घटनेने लोकं हळहळले पण तेवढेच संतप्तही झाले. 

लीलाधर यशोधरानगरातील पाहुणे लेआऊटमध्ये राहात होते. त्यांच्या आप्तेष्टांनी दिलेल्या माहितीनुसार, गायधने खासगी काम करायचे. त्यांचे दोन माळ्यांचे स्वतःचे घर आहे. लीलाधर तळमाळ्यावर राहात होते, तर दुसऱ्या मजल्यावर भाडेकरू ठेवले आहेत. त्यांना तब्बल ४० हजार रुपयांचे वीज बिल पाठविण्यात आले होते. बिलाची रक्कम बघुन त्यांना धक्कच बसला. चुकीने अवाजवी बिल पाठविण्यात आल्याचे त्यांचे म्हणणे होते. यामुळे महावितरण कार्यालयाकडे तक्रारी केल्यात. वारंवार चकरा मारल्या, अधिकाऱ्यांच्या भेटी घेत विनवण्याही केल्या. पण काडीचाही उपयोग झाला नाही. उलट बिल न भरल्यात वीजपुरवठा खंडीत करण्याचा दम त्यांना भरण्यात आला. 

या प्रकाराने ते कमालीचे व्यथित झाले. या चिंतेतच त्यांनी दारू पिण्यास सुरुवात केली होती. शनिवारी दुपारी घरासमोरच अंगावर रॉकेल टाकून त्यांनी स्वत:ला पेटवून घेतले. कुटुंबीयांनी धावपळ करित आग विझवून तत्काळ त्यांना रुग्णालयात नेले. मात्र, डॉक्टरांनी त्यांना मृत घोषित केले. भरमसाठ बिलाचा धसका आणि अधिकाऱ्यांकडून मिळणारी तुसडेपणाची वागणूक. यामुळे व्यथीत होऊन त्यांनी आत्माहत्या केल्याचे आप्तेष्टांचे म्हणणे आहे. तुर्तास यशोधरानगर पोलिसांनी अकस्मात मृत्यूची नोंद केली आहे.    (Edited By : Atul Mehere)