पाथर्डी : ""पाथर्डी-शेवगाव या तालुक्यांत ऊसतोड कामगार मोठ्या प्रमाणात आहेत. ऊसतोडणी कामगारांना तोडणीचा दर 27 टक्‍क्‍यांनी वाढवून देण्याचा आग्रह ज्येष्ठ नेते शरद पवार यांच्याकडे धरला आहे व तो मान्य केला जाईल,'' अशी ग्वाही पालकमंत्री हसन मुश्रीफ यांनी दिली.
माळेवाडी येथे पावसामुळे नुकसान झालेल्या पिकांची पाहणी करताना मुश्रीफ यांनी शेतकऱ्यांशी संवाद साधला. केदारेश्वर कारखान्याचे अध्यक्ष ऍड. प्रताप ढाकणे, माजी आमदार चंद्रशेखर घुले, महसूल विभागाचे नाशिक विभागीय आयुक्त राधाकृष्ण गमे, जिल्हाधिकारी डॉ. राजेंद्र भोसले, जिल्हा परिषदेचे अतिरिक्त मुख्य कार्यकारी अधिकारी जगन्नाथ भोर, शिवशकंर राजळे, बाळासाहेब ताठे आदी उपस्थित होते.
आगसखांड, शेकटे, भालगाव येथील पिकांचीही मुश्रीफ यांनी पाहणी केली. मुंगूसवाडे येथे विहिरीत बुडून मृत्युमुखी पडलेल्या माय-लेकीच्या घरी भेट देऊन नारायण हिंगे यांचे सांत्वन केले. सरकारी मदतीसाठी प्रयत्न करतो, असे आश्वासन दिले.
ऊसतोड कामगारांचा प्रश्न मार्गी लागावा, यासाठी राज्यपातळीवर मागणी होत आहे. पाथर्डी येथे काही ऊसतोड कामगारांनी त्यांच्या समस्या मुश्रीफ यांच्यासमोर मांडल्या. त्यांचे समाधान करताना महाविकास आघाडी सरकार शेतकऱ्यांना वाऱ्यावर सोडविणार नाही. ऊसतोड कामगारांचे प्रश्न सरकारला माहिती आहेत. या भागात ऊसतोड कामगार मोठ्या प्रमाणात आहेत. शेतकऱ्यांना अनुदान देण्याबरोबरच ऊसतोड कामगारांचे प्रश्नही जास्तीत जास्त लवकर मार्गी लावण्याचा प्रयत्न केला जाईल, असे आश्वासन मुश्रीफ यांनी दिले.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.