नगर : दक्षिण नगर जिल्ह्यातील आठ तालुक्यांतील शेतकऱ्यांचे केंद्र सरकारच्या योजनेतील कांदा चाळ व शेततळ्यांचे अनुदान मंजूर झाले आहे. केंद्र सरकारने पुरस्‍कृत केलेल्‍या राष्‍ट्रीय कृषि विकास योजनेेंतर्गत हे अनुदान थकले होते. कांदा चाळ उभारणीसाठी ४ कोटी ४१ लाख आणि वैयक्तिक शेततळे अस्‍तरीकरणासाठी ३ कोटी ४१ लाख रुपयांचे प्रलंबित असलेले अनुदान मंजूर झाले असल्याचे खासदार डॉ. सुजय विखे पाटील यांनी सांगितले.
हे प्रलंबित अनुदान मंजूर होण्यासाठी खासदार विखे पाटील यांनी विशेष पाठपुरावा केला. केंद्र सरकारकडे वारंवार अर्ज करून शेतकऱ्यांना अनुदान मिळवून दिल्याने कोरोनाच्या संकटात शेतकऱ्यांना त्याचा मोठा आधार होणार आहे.
याबाबत बोलताना डाॅ. विखे पाटील म्‍हणाले, की सध्या कोरोनामुळे शेतकऱी अडचणीत आहेत. त्यांचे प्रलंबित असलेले अनुदान मिळण्यासाठी आपण केंद्राकडे पाठपुरावा केला. केंद्र सरकारच्या माध्‍यमातून राबविण्‍यात येत असलेल्‍या राष्‍ट्रीय कृषि विकास योजनेच्‍या माध्‍यमातून कांदा उत्‍पादक शेतकऱ्यांना कांदा चाळ उभारणीसाठी अनुदान दिले जाते. कृषि विभागाच्‍या माध्‍यमातून याबाबत प्रस्‍ताव सादर केले जातात. या अनुदानासाठी शेतकरी वंचित राहिले होते. नगर दक्षिण लोकसभा मतदार संघातील आठ तालुक्‍यांमधुन सादर झालेल्‍या प्रस्‍तावांचा केंद्र सरकारकडे आणि कृषि विभागाकडे पाठपुरावा केल्‍यामुळे आजअखेर ५०७ शेतकऱ्यांना ४ कोटी ४१ लाख ३७ हजार ५०० रुपयांचे अनुदान मंजुर झाले आहे.
शेततळ्यांचे अनुदान मंजूर
राष्‍ट्रीय कृषि विकास योजनेच्‍या माध्‍यमातून सन २०१९-२० अंतर्गत वैयक्तिक शेततळे अस्‍तरीकरण योजनेसाठीही केंद्र सरकारने अनुदान मंजुर केले असून, यासाठी कृषि विभागाच्‍या माध्‍यमातून आत्‍तापर्यंत दाखल झालेल्‍या प्रस्‍तावांपैकी ४८४ शेतकऱ्यांच्या प्रस्‍तावाला मंजुरी मिळाली आहे. अनुदानापासुन वंचित राहिलेल्या या शेतकऱ्यांना एकुण ३ कोटी ४१ लाख १० हजार ३५१ रुपयांचे अनुदान मिळणार असल्याचे त्यांनी सांगितले.
या दोन्‍हीही योजनांबाबत कृषि विभागाकडे शेतकऱ्यांनी प्रस्‍ताव दाखल केलेल्‍या प्रस्‍तावालाही मंजुरी मिळावी, यासाठी आपला पाठपुरावा सुरू असून, उर्वरित शेतकऱ्यांनाही लवकरच या योजनेतून प्रलंबित अनुदान मिळेल, असे त्यांनी स्‍पष्‍ट केले. हे अनुदान मिळणार असल्याने शेतकऱ्यांना मोठा आधार होणार आहे. कारण कोरोनामुळे सध्या शेतमालाला भाव मिळत नाही. शिवाय विक्रीची व्यवस्था होत नसल्याने शेतकऱ्यांनी या वर्षी भाजीपाला लागवड करण्याचे टाळले आहे. त्या पार्श्वभूमीवर मिळालेले प्रलंबित अनुदान मिळणार असल्याने त्याचा फायदा शेतकऱ्यांना चांगला होणार आहे.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.