संगमनेर : शहर व तालुक्यातील कोरोनाची साखळी तोडण्याचा प्रशासन पूर्ण ताकदीने प्रयत्न करीत आहे. भावनेपेक्षा वस्तुस्थितीला महत्व देत, मुख्यमंत्री उद्धव ठाकरे यांच्या मार्गदर्शनाखाली कोरोनावर मात करण्यासाठीचे `माझे कुटुंब माझी जबाबदारी` हे अभियान तालुक्यात प्रभावीपणे राबवण्याची सूचना महसूलमंत्री बाळासाहेब थोरात यांनी केली.
अमृतवाहिनी अभियांत्रिकी महाविद्यालयात आयोजित केलेल्या जिल्हा परिषद सदस्य व पंचायत समिती सदस्यांच्या आढावा बैठकीत ते बोलत होते. ते म्हणाले, की राज्यात कोरोना तिसर्या टप्प्यात आला असून, त्याचा समर्थ मुकाबला करण्यासाठी मुख्यमंत्री उद्धव ठाकरे यांच्या मार्गदर्शनाखाली संपूर्ण राज्यात माझे कुटुंब माझी जबाबदारी हे अभियान राबविण्यात येत आहे. या माध्यमातून तालुका पातळी, जिल्हा परिषद गट, पंचायत समिती गट व गाव निहाय स्थापन केलेल्या आरोग्य समितीद्वारे नागरिकांमध्ये जनजागृती करावी. ग्रामीण भागामध्ये होणारे घरगुती समारंभ नागरिकांनी जाणीवपूर्वक टाळण्यासाठी पदाधिकार्यांनी मार्गदर्शन करावे. या संकटाच्य़ा काळात भावनेपेक्षा वस्तुस्थितीला महत्व द्यावे. याबाबत सर्व कार्यकर्ते व पदाधिकारी यांनी अधिक जागरूक होऊन आपल्या परिसरातील नागरिकांना सद्यस्थितीची माहिती देणे, कोरोनाची साखळी तोडणे हे आपले सर्वांचे अंतिम उद्दिष्ट आहे.
या बैठकीत कोरोना प्रतिबंधासाठी तालुका व शहरातील प्रशासनाकडून करण्यात येत असलेल्या उपाययोजना, सहकारी संस्थांच्यावतीने सुरू करण्यात आलेले कोविड केअर सेंटर, तालुक्यातील रुग्ण तपासणी व्यवस्था याबाबतची माहिती घेत, थोरात यांनी प्रशासकीय अधिकार्यांना काही सूचना केल्या. आमदार डॉ. सुधीर तांबे यांनीही नागरिकांमधील कोरोनाचे कमी झालेले गांभीर्य व वाढत्या गर्दीविषयी चिंता व्यक्त केली.
या वेळी नगराध्यक्ष दुर्गा तांबे ,जिल्हा परिषद महिला व बालकल्याण सभापती मिरा शेटे, पंचायत समिती सभापती सुनंदा जोर्वेकर, उपसभापती नवनाथ आरगडे, अजय फटांगरे, तहसीलदार अमोल निकम, नगरपालिकेचे मुख्याधिकारी डॉ. सचिन बांगर, आदी उपस्थित होते.
Edited By - Murildhar Karale
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.