राहुरी तालुक्यात भगरीतून विषबाधा ! रुग्णांच्या मदतीला धावले मंत्री तनपुरे

राहुरी : तालुक्यात दळलेल्या भगरीतून विषबाधा झाल्याने अनेकांना उलट्या, जुलाबाचा त्रास सुरू झाला. हा प्रकार समजताच नगरविकास राज्यमंत्री प्राजक्त तनपुरे यांनी संबंधित गावांत धाव घेतली. ग्रामस्थांची चर्चा करून, उपचाराबाबत सूचना केल्या.

तालुका अधिकाऱ्यांचे पथक म्हैसगाव येथे आले होते. मात्र, दवाखान्यात उपचार करण्यापूर्वी कोरोनाचाचणी करावी लागेल, या भीतीने अनेक जण घरीच औषधे घेत असल्याचे समजले. 

नवरात्रानिमित्त घरोघरी महिला व पुरुषांनी नऊ दिवसांचे उपवास सुरू केले. साबुदाणा, शेंगदाणे, भगर, राजगिरा, असा माल खरेदी केला. मात्र, त्यातील दळलेली भगर उपवास करणाऱ्या भाविकांच्या जिवावर उठली. भगरीतून विषबाधा झाल्याने, तालुक्‍यातील विविध गावांतील अनेकांना जुलाब-उलट्यांचा त्रास सुरू झाला. त्यांच्यावर खासगी दवाखान्यात उपचार सुरू आहेत. 

या भागात जास्त रुग्ण

म्हैसगाव येथे सर्वाधिक 58 जणांना विषबाधा झाली आहे. राहुरी फॅक्‍टरी येथे सात-आठ जण, शेटेवाडी (देवळाली प्रवरा) येथे पाच जण, मुसळवाडी व गंगापूर येथे चार-पाच जणांना काल (शनिवारी) रात्री भगरीची भाकरी खाल्ल्यानंतर त्रास सुरू झाला. गंगापूर येथील तिघे लोणी येथील रुग्णालयात उपचार घेत असल्याचे समजते. विषबाधा झालेल्यांमध्ये महिलांची संख्या जास्त आहे. म्हैसगाव येथे काही कुटुंबांतील दोन-तीन महिलांना विषबाधा झाली आहे. 

येथून झाली विषबाधा

राहुरी फॅक्‍टरी येथील एका किराणा व्यापाऱ्याकडून ठोक दराने दळलेली भगर खरेदी करून, ग्रामीण भागातील किरकोळ किराणा दुकानदारांनी विक्री केली. भगरीतून विषबाधा झाल्याचे समजताच, किरकोळ किराणा विक्रेत्यांचे धाबे दणाणले. त्यांनी तातडीने ठोक विक्रेत्याशी संपर्क साधला. ठोक विक्रेत्याने "दळलेली भगर ग्राहकांकडून परत मागवून घ्यावी. त्यांचे पैसे परत करून, प्रकरण वाढू देऊ नका,' असा निरोप दिला.

Edited By - Murlidhar Karale