पारनेर : ढवळपुरी शिवारात वाळूवाहतूक करणारा ट्रक नायब तहसीलदार मार्तंड माळवे यांनी पकडला. तहसील कार्यालयात ट्रक घेऊन येताना, डिकसळ येथील कुलट वस्तीजवळ वैभव पाचारणे याने ट्रकला दुचाकी आडवी लावली. नायब तहसीलदार माळवे यांना धक्काबुक्की केली. तसेच साक्षीदार सुनील भाबड यांना शिवीगाळ केली.

याप्रकरणी पारनेर पोलिसांत सात जणांविरुद्ध सरकारी कामात अडथळा आणल्याचा गुन्हा दाखल झाला आहे. राजू चंद्रकांत पाचारणे, नवनाथ कुटे, प्रीतम कुटे, प्रवीण कुटे यांचा आरोपींमध्ये समावेश आहे. आरोपींनी माळवे यांचा मोबाईल हिसकावून अंदाजे चार ब्रास वाळू रस्त्यावर खाली करून ट्रक घेऊन भाळवणीच्या दिशेने पळ काढला. याबाबत माहिती मिळताच, तहसीलदार ज्योती देवरे घटनास्थळी गेल्या. आरोपी विठ्ठल कुटे यास ताब्यात घेऊन पोलिसांच्या ताब्यात दिले.

दरम्यान, यापूर्वीही अनेकदा अधिकाऱ्यांवर हल्ला होण्याचे प्रकार तालुक्यात घडले आहेत. इतकेच नव्हे, तर तहसीलदारांवर डिझेल टाकून पेटवून देण्याचा प्रयत्नही झाला आहे. अनेक घटना घडूनही वाळुतस्करांची दादागिरी कमी होत नसल्याची स्थिती निर्माण झाली आहे. पारनेर तालुक्यातील वाळुतस्करांचे हल्ले महाराष्ट्रात गाजले होते.

Edited By - Murlidhar

अधिक राजकीय बातम्यांसाठी सरकारनामा अॅप डाऊनलोड करा