श्रीगोंदे : तालुक्‍यातील हिरडगाव येथील साईकृपा साखर कारखान्याकडे शेतकऱ्यांचे उसाचे पेमेंट बाकी आहे. त्यासाठी अनेकदा आंदोलने होऊनही त्याची दखल घेतली गेली नाही. त्यामुळे कारखान्याने थकबाकी दिल्याशिवाय त्यांना गाळपास परवानगी देऊ नये, अशी मागणी पाचपुते गटाचे समर्थक असणारे बाळासाहेब नाहाटा व संभाजी ब्रिगेडचे जिल्हाध्यक्ष टिळक भोस यांनी केली आहे.
नाहाटा व भोस यांनी पुण्यातील साखर आयुक्त शेखर गायकवाड यांची भेट घेऊन त्यांना निवेदन दिले. त्यावर साखर आयुक्त गायकवाड यांनी जिल्हाधिकारी डॉ. राजेंद्र भोसले यांच्याशी फोनवर संपर्क साधला. तहसीलदार प्रदीप पवार यांना तातडीने लिलावप्रक्रिया पूर्ण करण्याची सूचना केल्याचा दावा नाहाटा व भोस यांनी केला.
शेतकऱ्यांसह अनेक बॅंकांची साईकृपा कारखान्याकडे थकबाकी आहे. मोठ्या अडचणीतून हा कारखाना आठ दिवसांत सुरू करणार असल्याचे आमदार बबनराव पाचपुते यांनी जाहीर केले होते. मात्र, त्यास या दोघांनी आक्षेप घेतला आहे.
हेही वाचा..
नऊ एकरांचा व्यवहार ठरला, विक्री केली 20 गुठ्यांची
श्रीगोंदे : बनावट माणसे उभी करून दुसऱ्याच्या जमिनीची परस्पर विक्री करीत नगरच्या व्यावसायिकास 1 कोटी 55 लाख 21 हजार 300 रुपयांची फसवणूक केल्याप्रकरणी श्रीगोंदे पोलिसांनी आठ जणांविरुद्ध गुन्हा दाखल केला.
विशेष म्हणजे, त्यातही 9 एकरांचा व्यवहार ठरला असता, प्रत्यक्षात 20 गुंठ्यांचाच विक्री केली. विशाल संपत वाघमारे (रा. कोळगाव), रवी संजय ढवळे (रा. श्रीगोंदे), विश्वजीत रमेश कासार (रा. वाळकी, ता. नगर), सुनील फक्कड आडसरे, इंद्रजित रमेश कासार (रा. वाळकी), कोमल विश्वजीत कासार (रा. वाळकी) यांच्यासह दोन अनोळखींचा आरोपींमध्ये समावेश आहे.
याबाबत सूर्यकांत रावसाहेब कोल्हे (रा. नगर) यांनी पोलिसांत फिर्याद दिली. त्यानुसार, फिर्यादी कोल्हे यांची 5 जुलै 2020 रोजी आरोपी विश्वजित कासार याच्याशी वाघोली (पुणे) येथे ओळख झाली. कासार याने कोल्हे यांना फोनवर बागायती जमीन घ्यायची का, असे विचारत घोटवी येथील आनंद शेजवळ यांची 9 एकर जमीन विक्रीसाठी असल्याचे सांगितले. त्यानुसार कोल्हे यांनी घोटवी येथे जाऊन जमिनीची पाहणी केली. त्यानंतर 12 जुलै रोजी 1 कोटी 80 लाख रुपयांना व्यवहार ठरला. व्यवहारापोटी 5 लाख रुपयांचे टोकन व खरेदीसाठी लागणारा खर्च 9 लाख 50 हजार, असे एकूण 14 लाख 50 हजार रुपये कोल्हे यांनी दिले. नंतर 13 जुलै रोजी जमिनीचा खरेदी व्यवहार झाला. त्यावेळी बनावट लोकांना उभे करून त्यांच्या सह्या घेण्यात आल्या. त्या दिवशी दुय्यम निबंधक कार्यालयातील सेवा ठप्प झाल्याने, दुसऱ्या दिवशी (14 जुलै) खरेदी झाली. त्याचा फायदा घेत आरोपींनी कागदपत्रांत बदल केला.
Edited By - Murlidhar Karale
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.