Kasba By-Election : काँग्रेस कसबा मतदारसंघाची पोटनिवडणूक लढवणार का? नाना पटोलेंनी स्पष्टच सांगितलं...

Kasba By-Election : चिंचवड विधानसभा मतदारसंघ आणि कसबा विधानसभा मतदारसंघातील पोटनिवडणूक बिनविरोध होण्याची शक्यता धूसर होत चालली आहे. ही निवडणूक बिनविरोध होईल असे चित्र होते. मात्र, आता सर्वच पक्षाने ही निवडणूक लढवण्याची तयारी सुरू केली आहे. याच पार्श्वभूमीवर आज काँग्रेसचे प्रदेशाध्यक्ष नाना पटोले (Nana Patole) यांनी कसबा पोटनिवडणुकीवर भाष्य केले आहे.

नाना पटोले हे कसबा पोटनिवडणुकीबाबत बोलताना म्हणाले, ''या पोटनिवडणुकीबाबत भाजपचा प्रस्ताव काय येतोय, भाजप कोण उमेदवार देतंय, त्यानंतर आपण बोलू'', असे मत त्यांनी यावेळी व्यक्त केले. ते आज पुण्यातील एका कार्यक्रमासाठी आले असता बोलत होते.

''कसबा विधानसभा पोटनिवडणूक बिनविरोध होण्यासाठी प्रयत्न करू'', असं चंद्रकांत पाटील (Chandrakant Patil) म्हणाले. यावर पटोले म्हणाले, ''महाराष्ट्राची आजपर्यंत एक पंरपरा राहिली आहे. कुटुंबातील व्यक्तीचा मृत्यू झाला तर ती निवडणूक बिनविरोध करण्याचे काम काँग्रेसने केले.

पण महाविकास आघाडी (Mahavikas Aghadi) सरकारच्या काळात देगलूर, कोल्हापूर आणि पंढरपूरमध्ये झालेल्या पोटनिवडणुकीत त्या संबधित कुटुंबातील व्यक्तीला भाजपने विरोध केला होता. मात्र, आता कसबा विधानसभा पोटनिवडणुकीबाबत भाजपचा प्रस्ताव नेमकी काय येतोय? त्यांनी अजून उमेदवाराबाबत काही भूमिका मांडलेली नाही. त्यामुळे त्यांचा प्रस्ताव काय येतो? त्यानंतर आपण बोलू'', असं पटोले म्हणाले.

''कसबा पोटनिवडणूक लढवण्यासाठी काँग्रेसमधील अनेक जण इच्छुक आहेत. यासाठी तब्बल 8 ते 10 जणांनी माझ्याकडे अर्ज केले आहेत. या मतदार संघात 1980 पर्यंत काँग्रेसचे प्राबल्य होतं. त्यामुळे येणाऱ्या काळात कसबा मतदारसंघ काँग्रेसकडे आणण्यासाठी आमचा मास्टर प्लान आहे. यासाठी आमचे काम सुरू आहे, असं ते म्हणाले. तसेच येत्या 3, 4 फेब्रुवारीपर्यंत आमचा उमेदवार जाहीर करू, असंही पटोले यावेळी म्हणाले.

दरम्यान, चिंचवड विधानसभा मतदारसंघ आणि कसबा पोटनिवडणुकीसाठी सर्वच पक्षातील अनेकजण इच्छुक आहेत. त्यामुळे आता ही पोटनिवडणूक बिनविरोध होणार की येथे निवडणूक पार पडणार हे पाहणं महत्वाचे असणार आहे.