पिंपरी : भारतीय जनता पक्षाचे चिंचवडचे आमदार लक्ष्मण जगताप (Laxman Jagtap) यांचे बंधू आणि उद्योजक शंकर जगताप यांच्या कार्यालयावर रॉकेल भरलेल्या बाटल्या टाकल्याप्रकरणी पोलिसांनी तिघांना अटक केली. तर दोन अल्पवयीन मुलांना ताब्यात घेण्यात आले आहे. अटक करण्यात आलेल्या आरोपींना सहा दिवसांची कोठडी सुनावण्यात आली आहे. दहशत निर्माण करण्यासह प्रसिद्धीसाठी हा प्रकार केल्याचे आरोपी सांगत असले तरी पोलिसांकडून मूळ उद्देशापर्यंत पोचण्याचा प्रयत्न सुरू आहे. (Three arrested in attack on MLA Laxman Jagtap's brother's office)
प्रद्युम्न भोसले (वय २०), तन्मय मदने (वय १९), विक्रम जवळकर (वय २३, सर्व रा. सांगवी) अशी अटक करण्यात आलेल्यांची नावे आहेत. दोन अल्पवयीन ताब्यात आहेत. या घटनेप्रकरणी राहुल राम साळुंके (रा. पिंपळे गुरव) यांनी पोलिसांत फिर्याद दिलेली आहे. शंकर जगताप यांच्या पिंपळे गुरव येथील चंद्ररंग डेव्हलपर्स अ‍ॅण्ड बिल्डर्स या कार्यालयाच्या दिशेने मंगळवारी (ता. २३) दुपारी पावणे तीनच्या सुमारास आरोपींनी रॉकेलच्या दोन पेटत्या बाटल्या फेकल्या होत्या. एक बाटली सीमाभिंतीवर पडून तिचा स्फोट झाला होता, तर दुसरी बाटली शेजारील एका शटरवर पडली होती. या प्रकरणी गुन्हा दाखल झाल्यानंतर पोलिसांनी परिसरातील सीसीटीव्ही फुटेजच्या आधारे संशियत आरोपींचा शोध सुरू केला होता.
दरम्यान, पोलिसांनी या प्रकरणी तिघांना अटक केली असून, दोघांना ताब्यात घेतले आहे. या आरोपींकडे तपास केला असता त्यांनी दहशत निर्माण करण्यासह प्रसिद्धीसाठी हा प्रकार केल्याचे ते सांगत आहेत. मात्र, पोलिस उद्देशापर्यंत पोचण्याचा प्रयत्न करीत आहेत. अधिक तपास पोलिस करत आहेत.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.
