MLA Ravindra Dhangekar: फडणवीसांसाठी पुढचा काळ चांगला नसेल.. धंगेकरांना असं का म्हणाले?

MLA Ravindra Dhangekar: भाजपचा बालेकिल्ला म्हणून ओळखला जाणाऱ्या कसबा मतदारसंघात महाविकास आघाडीचे उमेदवार रवींद्र धंगेकर यांनी विजयश्री खेचून आणत इतिहास रचला. धंगेकर यांनी हेमंत रासने यांचा ११ हजार ४० मतांनी पराभव केला. या निकालानंतर नवनिर्वाचित आमदार धंगेकरांनी निवडणूक काळातील काही घडामोडीवर भाष्य केलं आहे. निवडणुकीनंतर एका वृत्तवाहिनीला दिलेल्या मुलाखतीत ते बोलत होते. यावेळी त्यानी त्यांच्या राजकीय प्रवासासह राजकारणातील अनेक गोष्टींवर भाष्य केलं.

२०२४ ला पुन्हा निवडणुका लागणार आहेत. हा बालेकिल्ला राखून ठेवण्यासाठी काय करणार, असा सवाल त्यांना विचारण्यात आला. यावर धंगेकर म्हणाले की, ''जनता जे ठरवेल ते मला मान्य असेल, पण मी कुठेही कमी पडणार नाही. महापालिकेच्या निवडणूकीतही पैशाचा पाऊस पडला, तेव्हाही जनतेने निवडून दिलं. आताही पाऊस पडला तरीही जनतेने निवडून दिलं. हा मोठा विजय आहे.

आगामी महापालिकां निवडणुकांमध्ये भाजपच्या नगरसेवकांचं आव्हान कसं पेलणार, यावर बोलताना त्यांनी सांगितलं की, खरंतर आतापर्यंत महापालिका निवडणुका होऊन जायला हव्या होत्या. पण हे राज्यसरकार घाबरत आहे. निवडणूक यंत्रणा हाताशी धरली आहे. मी तीस वर्षांच्या राजकारणार असा काळ कधीही पाहिला नाही. कॉंग्रेसचाही काळ पाहिला, पण त्यांनीही असं कधीच केलं नाही. विरोधकांना हाताशी धरुन त्यांनी राजकारण केलं. कार्यकर्ता जगवला. पण भाजप मात्र कार्यकर्त्याला, नेत्याला संपवण्याचंच काम करत आहे. ही परिस्थिती निर्माण झाली आहे.

फडणवीस मोठे नेते आहेत. पण त्यांचं धोरणचं वेगळं आहे. ज्या पद्धतीने ते राजकारणाचा आलेख ओढायचं काम करत आहे. ते अवघड आहे. आज केंद्रीय मंत्री नितीन गडकरी, ज्येष्ठ नेते शरद पवार, यांना समाज नमस्कार करतो. पण कार्यकर्ता म्हणून सांगतो, फडणवीसांसाठी पुढचा काळ चांगला नसेल... असं भाकितही त्यांनी वर्तवलं.

याचवेळी त्यांनी पालकमंत्री चंद्रकांत पाटील यांच्या हु इज धंगेकर या प्रश्नालाही उत्तर दिलं. चंद्रकांत दादा मोठे नेते आहेत. ते पालकमंत्री आहेत त्यांना मला बोलायचा अधिकार आहे आणि कोणाला उलटं बोलणं ही आपली संस्कृती नाही. माझ्या आईवडिलांनीही मला असं उलटं बोलायला शिकवलं नाही. राजकारणात माझ्यावर झालेली टीका मी स्वीकारली. रवी धंगेकर हे कार्डचं मोठ आहे. महाराष्ट्रात ते दिसत आहे.

तुमच्या कामाची व्याप्ती आता वाढली आहे. यापुढे आता काम कसं करणार, असा सवाल विचारल्यावर रवींद्र धंगेकर म्हणाले की, तुम्ही आता माझ्या ऑफिसमध्ये जा आणि तुमचं काम सांगा. बघा दहाव्या मिनिटाला तुमचं काम होईल. कारण माझ्या यंत्रणाच तशा आहेत. आता जबाबदारीही वाढली आहे. समाजाच्याही माझ्याकडून बऱ्याच अपेक्षा आहेत. त्यांच्यासाठी काहीतरी घडवावं लागेल, पण लोकांना यापेक्षाही जास्त प्रेम मी देणार. अशी ग्वाही त्यांनी दिली.