Nana Patole News: ...म्हणून नाना पटोलेंच्या कार्यक्रमाला पुणे विद्यापीठ प्रशासनाची 'नो परमिशन'!

Pune News: काँग्रेसचे नेते व प्रदेशाध्यक्ष नाना पटोले हे राज्याच्या राजकारणात नेहमीच चर्चेत असतात. पण आता सावित्रीबाई फुले पुणे विद्यापीठातील पटोलेंच्याच कार्यक्रमाला प्रशासनाकडून परवानगी नाकारण्यात आल्याचं समोर येत आहे.

सावित्रीबाई फुले पुणे विद्यापीठाच्या अनेक विद्यार्थी संघटनांनी काँग्रेस प्रदेशाध्यक्ष नाना पटोले यांच्या'विद्यार्थी संवाद' या कार्यक्रमाचे आयोजन करण्यात आले होते. मात्र, या कार्यक्रमाला विद्यापीठ प्रशासनाकडून परवानगी देण्यात आलेली नाही. परवानगी नाकारण्यामागं जी २० परिषदेच्या अनुषंगाने कार्यक्रम असल्याचं कारण दिलं आहे. तरीदेखील पटोलेंचा कार्यक्रम घेण्यावर विद्यार्थी संघटना ठाम आहेत.

नाना पटोले(Nana Patole) हे विद्यार्थ्यांचे प्रश्न, शैक्षणिक अडचणी, वसतीगृह, भोजनगृहाचा दर्जा, राष्ट्रीय शैक्षणिक धोरण आदी विषयांवर चर्चा करण्यासाठी 10 मे ला सावित्रीबाई फुले विद्यापीठात येणार होते. याच पार्श्वभूमीवर पुणे विद्यापीठात विविध विद्यार्थी संघटनांकडून 'विद्यार्थी संवाद' हा कार्यक्रम आयोजित केला होता. मात्र, आता प्रशासनानं कार्यक्रमाला परवानगी नाकारली आहे.

आधी 'या' प्रकरणी विद्यापीठाची बदनामी

शुभम जाधव(Shubham Jadhav) या रॅपरने सावित्रीबाई फुले विद्यापीठाच्या मुख्य इमारतीत ज्या ठिकाणी विद्यापीठाची अधिसभा भरते तिथे अश्लील भाषेत रॅप साँगचं शूटिंग केल्याचा धक्कादायक प्रकार समोर आला होता. यात ज्या खुर्चीवर कुलगुरु बसतात त्या खुर्चीवर बसून समोर टेबलवर दारुची बाटली ठेवून शुभम जाधव या रॅपरने रॅप साँग म्हटलं आहे. या प्रकरणी शुभम विरोधात चतुःश्रृंगी पोलीस ठाण्यात गुन्हा दाखल करण्यात आला आहे.

अभाविपचा राडा...

अभाविपने काही दिवसांपूर्वी पुणे विद्यापीठामध्ये अश्लील रॅप साँग शूट झाल्याप्रकरणी आणि त्यावर कुलगुरूंनी काय कारवाई केली? असा सवाल विचारत राडा घातला होता. यावेळी आंदोलकांनी प्रशासनाविरोधात जोरदार घोषणाबाजी केली. तसेच वरिष्ठ पदाधिकाऱ्यांची सुरु असलेली बैठकही यावेळी अभाविपनं उधळून लावली. यामध्ये काही ठिकाणी काचा देखील फूटल्या आहेत.

(Edited By Deepak Kulkarni)