हे अजितदादांचे काम नाही, ते माझे काम आहे : शरद पवारांची गुगली!

पुणे : बारामती तालुक्यातील सुपे येथील विद्या प्रतिष्ठानच्या शैक्षणिक संकुलाच्या इमारतीच्या पाहणीवेळी ज्येष्ठ नेते शरद पवार (Sharad Pawar) यांनी पुरंदरमधील नियोजित आंतरराष्ट्रीय विमानतळासंदर्भात येत्या १५ दिवसांत बैठक होणार आहे. त्यात हा प्रश्न मार्गी लावण्याचा प्रयत्न असल्याचे सांगितले. तसेच ‘हे अजितदादांचे (Ajit Pawar) काम नाही, तर माझे काम आहे,’ अशी गुगलीही त्यांनी टाकली.

राष्ट्रवादीचे आध्यक्ष पवार म्हणाले, ‘‘नियोजित आंतरराष्ट्रीय विमान तळासंदर्भात जागा निश्चित झाली. पण, संरक्षण खात्याने त्याला हरकत घेतली. त्यामुळे विमानतळाचा प्रश्न रेंगाळला आहे. पण येत्या पंधरा दिवसात मी स्वतः, खासदार सुप्रिया सुळे आणि राज्य सरकारचे प्रतिनिधी मिळून संरक्षण विभागातील संबंधित अधिकाऱ्यांबरोबर बैठक घेणार आहोत,''

‘‘संरक्षण विभागाची विमाने रोज सकाळी सरावासाठी या भागातून जात असतात. त्यामुळे त्यांची भूमिका काय आहे, हे समजून घ्यावे लागेल. त्यानंतरच विमानतळाबाबतचा प्रश्न मार्गी लागेल आणि हे काम अजितदादांचे नाही, तर हे काम माझे आहे,’’ असे शरद पवार यांनी स्पष्ट केले.

बारामती, दौंड व पुरंदर तालुक्याच्या लगतच्या गावांसाठी सुपे हे मध्यवर्ती बाजार पेठेचे गाव असल्याने उपमुख्यमंत्री अजित पवार यांनी लक्ष घातले आहे. गावात विद्या प्रतिष्ठानचे मोठे शैक्षणिक संकुल उभारले जात आहे. त्या बरोबरच उपजिल्हा रूग्णालय, मोठी बाजारपेठ होऊ घातली आहे.

पुणे जिल्ह्यात आंतरराष्ट्रीय विमानतळ नेमके कोठे होणार हा प्रश्न अद्यापही गुलदस्त्यात आहे. विमानतळ चाकणला होणार का पुरंदर तालुक्यात होणार याबाबत जिल्ह्यात उलट-सुलट चर्चा चालू आहे. याबाबत पवार यांनी येत्या पंधरवड्यात हा प्रश्न मार्गी लागणार असल्याचे सूतोवाच केले. त्यामुळे या होणाऱ्या बैठकीकडे पुणे जिल्ह्याचे लक्ष लागले आहे.