Dhangekar Vs Rasane : रवींद्र धंगेकरांचा रासनेंवर कडक पलटवार; म्हणाले,'' तो मोठा माणूस,पण...''

Pune Political News : कसबा पोटनिव़डणुकीत महाविकास आघाडीच्या रवींद्र धंगेकर यांनी भाजपच्या हेमंत रासनेंवर दणदणीत विजय मिळवला होता. यानंतर धंगेकरांनी उपमुख्यमंत्री देवेंद्र फडणवीस यांच्यावर जोरदार टीका केली होती. त्यावर रासनेंनी धंगेकरांना खडेबोल सुनावले होते. आता नवनिर्वाचित आमदार रवींद्र धंगेकर यांनी रासनेंच्या टीकेवर जोरदार पलटवार केला आहे.

रवींद्र धंगेकर(Ravindra Dhangekar) यांनी पुण्यात माध्यमांशी संवाद साधला. यावेळी ते बोलत होते. धंगेकर म्हणाले,हेमंत रासने मोठा माणूस आहे, त्याच्याबद्दल काय बोलणार. मी फडणवीसांना काहीच बोललो नाही. मी काही एवढा मोठा नाही पण फक्त एक कार्यकर्ता म्हणून विनंती केली. मात्र, मी देखील पाचवेळा महापालिकेत निवडणून आलोय. तीन विधानसभा निवडणूका लढवल्यात. त्यामुळे रासनेंपेक्षा माझा कार्यकाळ मोठा आहे. रासने यांनी एकदा तो तपासून घ्यावा असं प्रत्युत्तर धंगेकर यांनी रासनेंना दिले आहे.

रासने नेमकं काय म्हणाले होते?

धंगेकर यांनी फडणवीसांवर केलेल्या टीकेवर रासने यांनी भाष्य केले. रासने म्हणाले, रवीभाऊ, आपण विजयी झालात, त्याबद्दल आपलं अभिनंदन ! आपण देवेंद्रजींविषयी केलेले वक्तव्य वाचनात आले. आपण ज्या विधानभवनात पाऊल ठेवणार आहात, त्या विधानभवनाचे पर्यायाने या महाराष्ट्राचे नेतृत्व देवेंद्र फडणवीस यांनी सलग पाच वर्षे केले आहे. त्यामुळे त्यांच्याविषयी बोलताना तारतम्य बाळगा.

देवेंद्रजींच्या कारकीर्दीवर बोलावे इतके मोठे आपण नक्कीच नाहीत. कसब्याच्या जनतेने ज्यासाठी आपल्याला निवडून दिलंय, त्या जबाबदारीचे भान ठेवा. बाकी राजकारण करायला खूप विषय आहेत.' असं म्हणत हेमंत रासने यांनी धंगेकरांना खडेबोल सुनावले होते.

...पण त्यानंतर लोक फडणवीसांना नमस्कारही घालणार नाही!

कसब्यातील विजयानंतर रवींद्र धंगेकर यांनी उपमुख्यमंत्री देवेंद्र फडणवीसांवर टीकेची झोड उठवली होती. देवेंद्र फडणवीस यांचं राजकारण कुरघोडीचं, दुश्मनीचं आणि दबावाचं आहे. विरोधकांना राजकीय जीवनातून उद्धवस्त करायचं हाच अजेंडा घेऊन फडणवीस काम करतात. लोकशाहीची हत्या कशी करतात ते देवेंद्र फडणवीस यांच्याकडून शिकावं. आज सत्तेत असल्याने लोक त्यांना नमस्कार करतात पण सत्ता गेल्यावर लोक नमस्कार देखील घालणार नाही. फडणवीसांमुळे भाजपची प्रतिमा मलिन झाली आहे.