शिंदे गटात गेलेल्या पदाधिकाऱ्याचा धक्कादायक खुलासा; उद्धव ठाकरेंनाच लिहिले पत्र...

पुणे : मुख्यमंत्री एकनाथ शिंदे (Eknath Shinde) यांनी बंड केल्यानंतर अनेक आमदार आणि खासदार त्यांच्या गटात गेले. तसेच राज्यभरातील अनेक पदाधिकाऱ्यांनी शिंदे गटाला पाठिंबा दिला आहे. पुण्यातील (Pune) शिवसेनेचे (ShivSena) पदाधिकारी असलेल्या विटकर यांनी धक्कादायक खुलासा शिवसेना प्रमुख उद्धव ठाकरे यांना पत्र लिहित केला आहे.

शिवसेनेचे झोपडपट्टी विभागाचे प्रमुख राजू विटकर यांनी उद्धव ठाकरे यांना पत्र लिहिले आहे. त्यामध्ये ते म्हणाले, आपल्या न कळत एकनाथ शिंदे यांच्या गटात सामील करून फसवणूक झाल्याचे स्पष्टीकरण विटकर यांनी केले आहे. या पत्राची चांगलीच चर्चा राजकीय वर्तुळात सुरु झाली आहे.

काही दिवसांपूर्वी पुण्यातील काही शिवसेनेच्या पदाधिकाऱ्यांनी शिंदे गटात प्रवेश केला. त्यामध्ये विटकर यांचाही प्रवेश करण्यात आला होता. मात्र, हे नकळत झाल्याची कबुली विटकर यांनी दिली आहे. मला पुन्हा शिवसेनेत सहभागी करून घ्या, असा देखील उल्लेख पत्रात त्यांनी केला आहे. "चूक झाली, त्याबद्दल मी माफी मागतो", असे विटकर यांनी पत्रात म्हटले आहे.

विटकर म्हणाले, मी गेली ३० वर्ष शिवसेना पक्षामध्ये काम करत आहे. माझी फसवणूक झाली आहे. तरी मला पुन्हा पक्षात घ्यावे. मी नीलम गोर्हे व सचिन अहिर यांच्या नेतृत्वात पुन्हा काम करणार असल्याचे विटकर यांनी सांगितले.

विटकर यांच्या पत्रामुळे शिंदे गटात गेलेल्या पदाधिकाऱ्यांवर प्रश्न चिन्ह उपस्थित झाले आहेत. शिंदे यांच्या बंडानंतर त्यांना ४० आमदार आणि १२ खासदारांनी पाठिंबा दिला आहे. तसचे अनेक महापालिकेतील माजी नगरसेवकांनीही त्यांना पाठिंबा दिला आहे. तसेच अनेक पदाधिकारीही त्यांच्या गटात सहभागी होत आहेत. मात्र, विटकर यांच्या पत्रामुळे एकच खळबळ उडाली आहे.

दरम्यान, शिवसेनेचे नेते आदित्य ठाकरे (Aditya Thackeray) यांच्या 'निष्ठा' यात्रेमध्ये ते बंडखोर आमदारांवर टीका करत आहेत. मात्र, ज्यांना परत यायचे आहे, त्यांच्यासाठी शिवसेनेचे आणि 'मातोश्री'चे दरवाजे उघडे असल्याचे म्हटले आहे.