Jayant Patil Statement: "नार्वेकर आमचे जावई.. ते तसं करणार नाहीत"; जयंत पाटील असं का म्हणाले..

Jayant Patil On Rahul Narvekar: महाराष्ट्राच्या सत्तासंघर्षावर काही दिवसापूर्वी सुप्रीम कोर्टानं निर्णय दिला आहे. शिंदे गटाच्या सोळा आमदारांना अपात्र ठरविण्याचा निर्णय घेण्याचा अधिकार विधानसभा अध्यक्ष राहुल नार्वेकर यांना न्यायालयानं दिला आहे.

किमान पुरेसा वेळेत (रिजनेबल टाईम) सोळा आमदारांच्या अपात्रेबाबत निर्णय द्यावा, अशा सूचना न्यायालयाने दिल्या आहेत. याबाबतचा निर्णय घेण्यासाठी घाई करायची नाही व विलंबही करायचा नाही.जो निर्णय होईल, तो निर्णय संविधानातील तरतुदी व न्यायालयाच्या निर्देशानुसारच घेतला जाईल, असे नार्वेकरांनी स्पष्ट केले आहे.

यावर राष्ट्रवादी काँग्रेसचे नेते, प्रदेशाध्यक्ष जयंत पाटील यांनी प्रतिक्रिया दिली आहे. ते गुरुवारी पुण्यात माध्यमांशी बोलत होते. "भाजप आता लोकप्रिय पक्ष राहिलेला नाही.भाजप हा सर्वसामान्यांचा नव्हे, तर धनिकांची पाठराखण करणारा पक्ष म्हणून त्यांची गणना होत आहे.भाजपवर नागरिकांचा किती राग आहे, हे कर्नाटकच्या निवडणुकांमधून स्पष्ट झाले," असे जयंत पाटील म्हणाले.

जयंत पाटील म्हणाले, ""स्थानिक स्वराज्य संस्थांच्या निवडणुका ऑक्‍टोबर-नोव्हेंबर महिन्यात होण्याची शक्‍यता आहे. मात्र भाजप निवडणुका लांबवत जाण्याचे काम करीत असून त्यास राष्ट्रवादीला जबाबदार धरत आहे. प्रत्यक्षात, राष्ट्रवादी नव्हे, तर मुख्यमंत्री एकनाथ शिंदे यांच्यामुळेच निवडणुकांना विलंब होत आहे,"

सोळा आमदारांच्या अपात्रेबाबत जयंत पाटील म्हणाले, " न्यायालयाने अपात्र आमदारांबाबत निर्णय घेण्यासाठी राहूल नार्वेकर यांना किमान पुरेसा वेळ (रिजनेबल टाईम) दिला आहे. नार्वेकर हे आणखी किती वेळ घेतात, याची सर्वोच्च न्यायालयच वाट पाहत आहे. न्यायालयाने दिलेल्या निकालास बगल देण्याचे काम केले आहे," अशी टीका जयंत पाटील यांनी केली.

ते म्हणाले, "नार्वेकर आमचे जावई आहेत, ते तसे करणार नाही, आमचा त्यांच्यावर विश्वास आहे,' असा टोला त्यांनाी लगावला.