Ajit Pawar News : सिंचन घोटाळा प्रकरणात राष्ट्रवादी नेते, विरोधीपक्षनेते अजित पवार यांच्यावर आरोप करण्यात आले होते. या प्रकरणानंतर विरोधकांनी त्यांच्यावर जोरदार हल्लाबोल केला होता.
अजित पवार यांच्या हस्ते जलसंपदा विभागातील माजी निवृत्त सचिव सुरेश सोडळ यांच्या ‘माझी जीवनधारा’ पुस्तकाचे प्रकाशन दी इन्स्टिटय़ूट ऑफ इंजिनिअर्सच्या सभागृहात शनिवारी झाले. जलसंपदा विभागाचे निवृत्त सचिव नंदकुमार वडनेरे, निवृत्त सचिव विद्यानंद रानडे, राजहंस प्रकाशनचे मुख्य संपादक डॉ. सदानंद बोरसे, अभियंता मित्रचे संपादक डॉ. कमलकांत वडेलकर उपस्थित होते. यावेळी पवारांनी त्यांच्यावर करण्यात आलेल्या आरोपावर स्पष्टीकरणं दिले.
"धडाडीने काम करणे हा माझा स्वभाव आहे. मी कधी बदनामीची पर्वा केली नाही, माझ्या मताशी ठाम राहतो, चूक झाली तर माफीही मागतो, जलसंपदा विभागातील माझ्या कामातील चांगल्या कामाची चर्चा कमी झाली, तर काही कामांबाबत उगाचच आरोप करून बदनामी करण्यात आली. माझ्यावरचा एकही आरोप सिद्ध झाला नाही. तत्कालीन जलसंपदा सचिव सुरेश सोडळ यांचे ऐकले असते तर आरोप झालेच नसते, असे पवार म्हणाले.
"सोडळ यांनी जलसंपदा विभागात तळमळीने काम केले. माझ्या राजकीय कारकिर्दीत वित्त विभाग, जल संपदा, ऊर्जा विभाग अशा विविध जबाबदाऱ्या निभावल्या," असे पवार यांनी नमूद केले.
"राज्य आणि राज्यातील शेतकरी महत्त्वाचा असतो. काही वेळा कठोर निर्णय घ्यावे लागतात. त्यातून बदनामीही झाली.जलसंपदा विभागाचा मंत्री म्हणून काम करताना राज्य पाण्याच्या बाबतीत स्वयंपूर्ण व्हावे, शेती आणि पिण्यासाठी मुबलक पाणी असावे यासाठी प्रयत्न केला," असे पवार म्हणाले.
1999 ते 2009 या काळात बंधारे आणि सिंचन प्रकल्पांच्या बांधकामात गैरव्यवहार झाल्याचा आरोप पवार यांच्यावर झाला. सिंचनावर 70,000 कोटी रुपये खर्च झाले, पण सिंचन क्षेत्रात केवळ 0.1 टक्क्यांची सुधारणा झाली असं निरीक्षण सरकारच्याच इकोनॉमिक सर्व्हे मध्ये होतं.
या काळात अजित पवार हे जलसंपदा मंत्री होते. सिंचन प्रकल्पांच्या कंत्राट वाटपात तसंच त्यांच्या पूर्ततेमध्ये अनियमतता आढळली अशी नोंद CAG ने आपल्या अहवालात केली होती.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.
