आम्हाला कामधंदे आहेत, म्हणत फडणवीसांनी उडवली राऊतांची खिल्ली

मुंबई : राजकीय फायद्यांसाठी, निवडणुका जिंकण्यासाठी तुम्ही जे करत आहात ते देशासाठी घातक आहे. कालही दिल्लीत हमुनान जयंतीनिमित्त काढलेल्या मिरवणुकीवर जो हल्ला झाला, तसा यापूर्वी कधीही झाला नव्हता. मात्र, आज देशात निवडणुका (Election) जिंकण्यासाठी जाणीवपूर्वक देशातील वातावरण बिघडवण्याचा प्रयत्न केला जात आहे, काल दिल्लीत (Delhi) मिरवणुकीवर झालेला हल्ला हो पूर्वनियोजित होता, असा आरोप शिवसेना खासदार संजय राऊत (Sanjay Raut) यांनी केला होता. त्यावरुन विरोधी पक्षनेते देवेंद्र फडणवीस (Devendra Fadnavis) यांनी राऊत यांच्यावर टीका केली.

देवेंद्र फडणवीस पुण्यात बोलत होते. यावेळी त्यांना संजय राऊतांच्या आरोपांवर विचारले असता ते म्हणाले, संजय राऊत हे निराश व्यक्ती आहेत. ते दिवसभरात काहीही बोलत असतात. कितीवेळा आम्ही उत्तरे द्यायची. आम्हाला कामधंदे आहेत, त्यांना नाहीत, अशा शब्दांत त्यांनी राऊतांची खिल्ली उडवली.

राऊत काय म्हणाले होते?

राजधानी दिल्लीत शनिवारी हनुमान जयंतीनिमित्त आयोजित मिरवणुकीवर काही समाज कंटकांनी हल्ला केला. या घटनेवर बोलताना त्यांनी विरोधकांवर सडकून टिका केली. ''कालचा हल्ला हा राजकीयदृष्ट्या प्रेरित होता. देशात पुन्हा हिंदू मुसलमान दंगे व्हावेत, असे वातावरण तयार केले जात आहे. कारण आता निवडणुकांमध्ये भारत पाकिस्तान चालणार नाही, सर्जिकल स्ट्राईक, राममंदिर चालणार नाही. म्हणून देशातील चार-पाच राज्यातील आगामी निवडणुकांच्या दृष्टीने मतांच्या दृष्टीने देशातील वातावरण बिघडवण्याचे षडयंत्र सुरु, असल्याचा आरोप राऊत यांनी केला होता.

याच वेळी त्यांनी महाराष्ट्रातील परिस्थितीवरही भाष्य केले. "महाराष्ट्रातही मुंबईपासून राज्यातील अनेक भागात रामनवमी, हनुमान जयंतीच्या दिवशी शांतता भंग करण्याचा प्रयत्न झाला, दंगली भडकवण्याचा प्रयत्न केला गेला, पण महाराष्ट्रातील जनता आणि पोलीस संयमी आहेत. भगवान श्रीराम आणि हनुमान यांच्या नावाखाली महाराष्ट्रातली शांतता भंग करण्याचा, दंगे भडकावण्याचा येथील नव हिंदू, नव्या ओवेसींचे मिशन होते. पण आम्ही तसे होऊ दिले नाही, आणि यापुढेही होऊ देणार नाही, असेही राऊत म्हणाले होते.