एका मांजरामुळे झाले शंभर कोटींचे नुकसान आणि तीन लाख रहिवाशांची होरपळ...

पिंपरी : पिंपरी-चिंचवडच्या (Pimpri-Chinchwad) भोसरी आणि आकुर्डी भागातील साठ हजार ग्राहकांचा वीजपुरवठा बुधवारी (ता.२३ मार्च) सकाळी खंडित झाला होता. तो आठ तासानंतरच सुरळीत झाला. तोपर्यंत भोसरी एमआयडीसीतील (Bhosri MIDC) साडेसात हजार लघुउद्योजकांचे शंभरकोटी रुपयांचे नुकसान झाले होते. तर, दुसरीकडे तीन लाखांवर पिंपरी-चिंचवडकरांची ऐन उन्हाळ्यात मोठी होरपळ झाली होती. महापारेषण कंपनीच्या भोसरीतील अतिउच्चदाब उपकेंद्रातील बिघाडामुळे विजेचा हा खेळखंडोबा झाला होता. त्या बिघाडाला एक मांजर कारणीभूत ठरली. महापारेषण कंपनीनेच तसे सांगितले आहे. (Mahavitaran)

दरम्यान, पिंपरी-चिंचवडमधील वीजबिघाडाचे पडसाद गुरुवारी (ता.२४ मार्च) विधानसभेतही उमटले. भोसरीचे भाजप आमदार महेश लांडगे (Mahesh Landge) यांनी विधीमंडळाच्या प्रवेशव्दारावर राज्य सरकारचा निषेधार्थ आंदोलन करीत नंतर विधानसभेत हा प्रश्न उपस्थित केला. दरम्यान, युद्धपातळीवर प्रयत्न करून दुपारनंतर ही बिघाड दुरुस्त करण्यात महापारेषणला यश आले. मांजरामुळे हा तांत्रिक बिघाड होऊन वीजपुरवठा खंडित झाला होता, असे त्यानंतर महापारेषणच्या प्रवक्त्याने सांगितले. अधिवेशन सुरु असल्याने ऊर्जामंत्री डॉ. नितीन राऊत, प्रधान सचिव (ऊर्जा) तथा अध्यक्ष व व्यवस्थापकीय संचालक दिनेश वाघमारे यांनी वेळोवेळी याबाबत माहिती घेऊन वीजपुरवठा सुरळीत ठेवण्यासाठी आवश्यक त्या सूचना व मार्गदर्शन केले होते. दरम्यान, या घटनेला कारणीभूत ठरलेले मांजर वीजेचा शॉक बसून मरण पावले आहे.

महापारेषणच्या भोसरी येथील विद्युत रोहित्रामध्ये सकाळी सहाच्या सुमारास चालू वीज उपकरणावर मांजर चढल्यामुळे बिघाड झाला. त्यामुळे भोसरी, आकुर्डी व परिसरातील वीजपुरवठा खंडित झाला. परिणामी भोसरी एम.आय.डी.सी, भोसरी परिसर, आकुर्डी परिसरात चक्राकार पध्दतीने भारनियमन करावे लागले, असे महापारेषणमधून लेखी स्वरुपात सांगण्यात आले. बिघाड झालेले रोहित्र सध्या पूर्णतः नादुरूस्त आहे. ते बदलण्यासाठी साधारणतः दोन ते तीन दिवसांचा कालावधी लागणार आहे. महापारेषणकडून भोसरी उपकेंद्रामध्ये पर्यायी रोहित्र बसविण्याची व्यवस्था सुरू आहे. तोपर्यंत वीजग्राहकांनी सहकार्य करावे, असे आवाहन महापारेषण व महावितरण कंपनीच्या वतीने करण्यात आले आहे.