Khed Bazar samiti Result : खेड बाजार समितीवर राष्ट्रवादीचे वर्चस्व कायम : मोहितेंसह १० जण विजयी; विरोधकांना ६ जागा

राजगुरुनगर (जि. पुणे) : खेड (Khed) तालुका कृषी उत्पन्न बाजार समितीवर (Bazar Samiti) राष्ट्रवादी कॉंग्रेस पुरस्कृत (NCP) भीमाशंकर शेतकरी सहकार पॅनेलचा विजय झाला असून या पॅनेलने १६ पैकी १० जागा जिंकून बाजार समितीवर वर्चस्व मिळविले आहे. सर्वपक्षीय भीमाशंकर शेतकरी सहकारी परिवर्तन पॅनेलला ६ जागा मिळाल्या आहेत. यामध्ये व्यापारी विजयी उमेदवारांचा समावेश नाही. (NCP continued to dominate the Khed Bazar Samiti)

बाजार समितीच्या निवडणुकीत आमदार दिलीप मोहिते (Dilip Mohite) यांच्या नेतृत्वाखालील राष्ट्रवादी कॉंग्रेस पुरस्कृत भीमाशंकर शेतकरी सहकारी पॅनेल आणि सर्वपक्षीय भीमाशंकर शेतकरी सहकारी परिवर्तन पॅनेल हे प्रमुख प्रतिस्पर्धी होते.

भीमाशंकर सहकार पॅनेलने कृषी पतसंस्था मतदारसंघातून ७, ग्रामपंचायत मतदारसंघातून २, हमाल तोलारी मतदारसंघातून १ जागा जिंकून बाजार समितीवर निर्विवाद वर्चस्व मिळविले. या पॅनेलमधून कृषी पतसंस्था सर्वसाधारण मतदारसंघातून आमदार दिलीप मोहिते, कैलास लिंभोरे, विनोद टोपे, जयसिंग भोगाडे हे विजयी झाले. इतर मागास प्रवर्गातून हनुमंत कड विजयी झाले आहेत.

महिला राखीव गटातून कमल कड या विजयी झाल्या. कृषी पतसंस्था अनुसूचित जमाती गटातून विठ्ठल वनघरे हे निवडून आले. हमाल व तोलारी मतदारसंघातून सयाजी मोहिते हे विजयी झाले. ग्रामपंचायत सर्वसाधारण मतदारसंघातून रणजित गाडे हे विजयी झाले. ग्रामपंचायतीच्या आर्थिक दुर्बल गटातून अशोक राक्षे हे निवडून आले.

सर्वपक्षीय पॅनेलने कृषी पतसंस्था मतदारसंघातून ४, ग्रामपंचायत मतदारसंघातून २ जागा जिंकल्या. या पॅनेलमधून कृषी पतसंस्था सर्वसाधारण मतदारसंघातून विजयसिंह शिंदे, अनुराग जैद, सोमनाथ मुंगसे हे विजयी झाले. महिला राखीव गटातून क्रांती सोमवंशी या विजयी झाल्या आहेत. ग्रामपंचायत मतदारसंघातून सागर मुऱ्हे विजयी झाले आहेत. ग्रामपंचायतीच्या अनुसूचित जाती-जमाती मतदारसंघातून सुधीर भोमाळे हे विजयी झाले आहेत. पॅनेलविरहित निवडणूक लढविलेल्या व्यापारी व आडते मतदारसंघातून माणिक गोरे व महेंद्र गोरे हे विजयी झाले.