अजितदादांच्या टिकेला हवामान विभागाचे तिखट प्रत्युत्तर

मुंबई : हवामान खात्याचे (Meteorological Department) अंदाज सध्या चुकायला लागले आहेत. रेड अलर्ट देतात आणि पाऊसच पडत नाही. मात्र, शाळांना सुट्टी जाहीर होते. हवामान खात्यावर केंद्रसरकारने व राज्याने हवा तो खर्च करावा आणि सुधारणा करावी. हवामान खात्याने जाहीर केले की पाऊस पडतच नाही, असे विधानसभेचे विरोधी पक्षनेते अजित पवार (Ajit Pawar) यांनी म्हटले होते. त्यावर हवामान विभागाने उत्तर दिले आहे.

अजित पवार यांनी मुंबईत आज पत्रकार परिषदेत हवामान विभागाच्या कामकाजावर प्रश्नचिन्ह उपस्थित केले होते. याविषयी पुणे हवामान विभागाचे प्रमुख के. एस. होशाळीकर (K. S. Hoshalikar) यांनी प्रतिक्रिया दिली. हवामान विभाग जे काही अंदाज दर्शवत असते त्यातील अंदाज बऱ्यापैकी बरोबर असतात.

काही दिवसांपूर्वी पुणे जिल्ह्यासाठी तीन दिवसांसाठी रेड अलर्ट जाहीर करण्यात आला होता. यासाठी पुणे तसेच पिंपरी चिंचवडमध्ये शाळांना सुट्टी दिली होती. खाजगी कार्यालयात काम करणाऱ्या कर्मचाऱ्यांना वर्क फ्रॉम होमचे आदेश देण्यात आले होते. मात्र, त्या काळात पाऊस पडलाच नाही, त्यामुळे अजित पवारांनी हवामान विभागावर टीका केली.

यावर होशालीकर म्हणाले, हवामान विभागाने दिलेल्या सूचना नीट वाचल्या जात नाहीत. हवामान विभागाने फक्त घाटमाथा परिसरात मुसळधार पाऊस होईल असा अंदाज वर्तवला होता. तो बऱ्यापैकी पूर्ण झाला आहे. हवामान विभागाकडे बऱ्यापैकी यंत्रसामग्री असून केंद्र सरकार पुरेपूर निधी वेळोवेळी हवामान विभागाला देत असते. पुढच्या २५ वर्षाचे नियोजन हवामान विभागाकडे आहे.