पंतप्रधानांच्या दौऱ्यामुळे मारूती भापकरांसह काही कार्यकर्ते पोलिसांच्या ताब्यात

पिंपरी : व्हीआय़पींचा पिंपरी-चिंचवड दौरा आणि शहरातील सामाजिक कार्यकर्ते मारुती भापकर यांना पोलिसांनी ताब्यात घेणे (डिटेन करणे) हे आता एक समीकरणच झाले आहे. पंतप्रधान नरेंद्र मोदी देहू येथे (ता. हवेली, जि. पुणे) शिळा मंदिराच्या उदघाटनासाठी आज आले आहेत. तत्पूर्वी सकाळीच भापकरांना पिंपरी पोलिसांनी पुन्हा ताब्यात घेतलं आहे. देहूतील मोदींची सभा संपल्यानंतर सायंकाळी त्यांची सुटका होण्याची शक्यता आहे. (Maruti Bhapkar Latest Marathi News)

विरोधी पक्षनेते देवेंद्र फडणवीस यांच्या शहरातील कार्यक्रमाच्या वेळीही भापकर यांना पोलिसांनी ताब्यात घेतले होते. आतापर्यंत आठ-दहा वेळा पोलिसांनी त्यांच्याविरुद्ध अशी कारवाई केली आहे. फडणवीस मुख्यमंत्री असताना ही प्रतिबंधक कारवाई त्यांच्याविरुद्ध अधिकवेळा झाली आहे. तर, महाविकास आघाडी सरकार आल्यानंतर दुसऱ्यांदा त्यांना पोलिसांनी अशाप्रकारे ताब्यात घेतलेले आहे. (PM Narendra Modi in Dehu today)

लोहमार्गालगतच्या आपल्या हद्दीतील झोपड्या हटविण्यासाठी नोटीस बजावलेल्या पिंपरी-चिंचवडमधील रेल्वेमार्गालगतच्या झोपडपट्यांचे पुनर्वसन करण्याच्या मागणीकडे लक्ष वेधण्यासाठी भापकर हे पंतप्रधानांचा कार्यक्रम असलेल्या देहूमध्ये लाक्षणिक उपोषण आज करणार होते. त्यामुळे पोलिस त्यांच्या मागावर होते. सकाळीच त्यांना ताब्यात घेण्यात आले. मात्र, त्यानंतर पोलिस ठाण्यातच त्यांनी उपोषण सुरु केले आहे.

पोलीस ठाण्यातूनच 'सरकारनामा'शी बोलताना त्यांनी हा प्रश्न शहरातील काही हजार रहिवाशांनाच नाही तर मुंबईत लाखो आणि देशभरात काही कोटी लोकांना भेडसावतो आहे, असे सांगितले. त्यांच्या पुनर्वसनाची पिंपरी-चिंचवड महापालिका व राज्य शासनाची तयारी आहे. मात्र, केंद्र सरकार ही जबाबदारी टाळू पाहते आहे. म्हणून त्याकडे पंतप्रधानांचे लक्ष वेधण्यासाठी उपोषण करणार होतो,असे ते म्हणाले.

तिन्ही यंत्रणांनी मिळून हा प्रश्न सोडविला पाहिजे, अशी त्यांची मागणी आहे. एकीकडे २०३० पर्यंत सर्वांना घरे देण्याची घोषणा करायची आणि दुसरीकडे आहे त्यांची घरे काढून घ्यायची हा दुटप्पीपणा आहे, असे म्हणत नाव न घेत त्यांनी मोदींना लक्ष्य केले.