Kasba By-Election : निकालाआधीच विजयाचा दावा : धंगेकर-रासनेंच्या कार्यकर्त्यांची फ्लेक्सबाजी!

Kasba By-Election : कसबा विधानसभा पोटनिवडणुकीसाठी नुकतेच मतदान पार पडले. महाविकास आघाडी पुरस्कृत काँग्रेसचे उमेदवार रवींद्र धंगेकर (Ravindra Dhangekar) तर भाजपचे उमेदवार हेमंत रासने (Hemant Rasane) यांच्यात ही मुख्य लढत आहे. मतदानानंतर निकाल २ मार्च रोजी जाहीर होणार आहेत. मात्र निकालाआधीच दोन्ही उमेदवारांच्या कार्यकर्त्यांकडून विजयाचा दावा करण्यात येत आहे. यामुळे पुण्यात एकच चर्चा सुरू झाली आहे.

रवींद्र धंगेकर यांची आमदारपदी निवड झाल्याच्या आशयाचे होर्डींग्स पुण्यात लावण्यात आलेले दिसून आले होते. आता भाजपचे हेमंत रासने यांचा विजयाचा दावा करणारा होर्डींग लावण्यात आला आहे. निकाला आधीच विजयाचा दावा केल्याने, आता सोशल मीडीयावर एकच चर्चा होत आहे. निकालाआधीज अतिउत्साही कार्यकर्त्यांनी विजयाचा दावा करत फ्लेक्सबाजी केली आहे.

दरम्यान, कसबा पोटनिवडणुकीत रविवारी मतदान पार पडले. २ मार्च रोजी या निवडणुकीचा निकाल येणार आहे. या निवडणुकीत प्रचारादरम्यान अनेक राजकीय घडामोडी घडून आले. भाजप व महाविकास आघाडीच्या नेत्यांनी आपापले पक्ष आणि उमेदवारासाठी जोरदार प्रचार केला. लढत अतिशय चुरशीची असल्यामुळे निकालाआधीच विजयाचा दावा करणे कठीण असताना, विजयाचा दावा करत होर्डिंग्जबाजी सुरू झाल्याने, आता चर्चा होत आहे.